التى جاسار جۇڭگو قىزى رۋبيك كۋبيگىن 4 سەكۋندتان ءسال استام ۋاقىتتا جيناپ، ايەلدەر اراسىنداعى جاڭا الەمدىك رەكورد ورناتتى. بۇل تۋرالى مەملەكەتتىك بۇقارالىق اقپارات قۇرالدارى حابارلادى، دەپ جازادى infohub.kz سايتى.
«سپيدكۋبەر» ليان يۋنچجي وسى ايدا ۋحان مەن گۋانچجوۋدا وتكەن رۋبيك كۋبيگى قاۋىمداستىعى سەرتيفيكاتتاعان ەكى جارىستا 3x3 بويىنشا ايەلدەر اراسىنداعى ورتاشا الەمدىك رەكوردتى ەكى رەت جاڭارتتى. بۇل جونىندە مەملەكەتتىك «CCTV» تەلەارناسى دۇيسەنبى كۇنى مالىمدەدى.
ول رۋبيك كۋبيگىن بەس رەت جيناعان سوڭ 4،52 جانە 4،27 سەكۋند ورتاشا ناتيجە كورسەتتى.
چەندۋ قالاسىنان شىققان قىز «4،5 سەكۋندتان تومەن ورتاشا ناتيجە كورسەتكەن تۇڭعىش ايەل سپيدكۋبەر» اتاندى، دەپ حابارلادى «CCTV».
تەلەارنا جاريالاعان بەينەجازبادا ول باسىنا قىزىل ءتۇستى تورلى بانتيك تاققان كۇيى رۋبيك كۋبيگىن ەپتىلىكپەن بۇرىپ، شيراتىپ جاتقانى كورىنەدى.
كۋبيكتى جيناپ بولعان سوڭ ول ويىنشىقتى ۇستەلگە قويىپ، قولىن شاپالاقتاپ، جۇدىرىعىن جوعارى كوتەرگەن.
«چجيچجي» دەگەن لاقاپ اتى بار التى جاسار قىز رۋبيك كۋبيگىمەن بي جانە مۋزىكا ساباقتارى سياقتى ءتۇرلى سىنىپتان تىس ۇيىرمەلەرمەن قاتار ارنايى كۋرسقا جازىلعان سوڭ تانىسقان. بۇل تۋرالى ونىڭ اناسى لين يانسي جەرگىلىكتى بۇقارالىق اقپارات قۇرالدارىنا ايتتى.
لين كۋبيك جيناۋدىڭ «بالانىڭ جان-جاقتى قابىلەتىن دامىتۋعا تاپتىرماس ارەكەت» ەكەنىن «بىرتە-بىرتە ءتۇسىنىپ»، نازارىن سوعان اۋدارعانىن چەندۋداعى «Red Star News» باسىلىمىنا مالىمدەدى.
قىزى ءقازىر رۋبيك كۋبيگىن جيناۋدىڭ 1300-دەن استام الگوريتمىن مەڭگەرىپ، كۇن سايىن ەكى-ۇش ساعات جاتتىعادى، دەدى لين.
«Red Star News» جاريالاعان سۋرەتتەردە قىزدىڭ جۇلدەلەرى ۇيىندەگى سورەگە قويىلعانى كورىنەدى.
«رۋبيك كۋبيگىن جيناۋ زەيىندى، جادىنى، لوگيكالىق ويلاۋدى، كەڭىستىكتى ءتۇيسىنۋدى جاقسارتىپ، جەڭىس پەن جەڭىلىسكە دەگەن سالاۋاتتى كوزقاراس قالىپتاستىرۋعا كومەكتەسەدى»، — دەدى لين.
«بۇل فورمۋلالاردى سوقىر جاتتاۋ ەمەس، وڭتايلى شەشىمدى تابۋ ءۇشىن لوگيكالىق پايىمداۋدى قولدانۋ»، — دەپ قوستى ول.