بىرنەشە جىل بۇرىن كوتتەدج قۇرىلىسىنا اقشا سالعان الماتىلىقتار ءالى كۇنگە دەيىن ۇيلەرىنە كىرە الماي وتىر. زارداپ شەككەندەر اقشانى قايتارۋدى تالاپ ەتىپ، قۇرىلىس سالۋشى حالىقارالىق ىزدەۋ جاريالانعان، دەپ حابارلايدى infohub.kz.
انىقتالعانداي، 50-دەن استام ادام ءتورت جىل بۇرىن ىرگەتاسى قالانعان كەزدە كوتتەدجدەردى ساتىپ العان. كوبى نەسيە راسىمدەپ، ءوز ۇيلەرىن ساتىپ جىبەرگەن، ءبىراق قونى تويىن تويلاي الماعان. ءقازىر ولار وبەكتىنى مارودەرلەردەن قورعاۋ ءۇشىن كۇن سايىن سول جەرگە بارۋعا ءماجبۇر.
ۇلەسكەرلەردىڭ ءبىرى رۋستەم ءابۋعالي قۇرىلىس سالۋشى سەنىم ۇيالاتقانىن ايتتى: قۇرىلىس الاڭى قورشالعان، جۇمىسشىلار جۇمىس ىستەپ، تەحنيكا تۇرعان. الايدا تاپسىرۋ مەرزىمى ۇنەمى كەيىنگە شەگەرىلىپ، كەيىن ءبىر ۇيگە بىرنەشە ساتىپ الۋشىنىڭ ۇمىتكەر ەكەنى بەلگىلى بولعان. «ول الدىمەن بىزگە ساتتى، كەيىن تاعى ءبىر يەسىنە ساتتى، سوسىن تاعى بىرىنە»، — دەدى ول.
كوتتەدج قالاشىعىنىڭ قۇرىلىسى 2022 جىلى باستالعان. ءار ءۇي ءۇشىن قۇرىلىس سالۋشى 33 ميلليون تەڭگەدەن سۇراعان. قازىرگى ۋاقىتتا وبەكتىدە تەك ىرگەتاس پەن كىرپىش قابىرعالار عانا تۇرعىزىلعان، تەرەزەلەر، ەسىكتەر مەن باسپالداقتار جوق. جۇمىس تولىعىمەن توقتاتىلعان.
ەرجان شەراليەۆتىڭ وتباسى كەڭەيتۋگە بەل بۋىپ، 400 شارشى مەترلىك ءۇيىن ءۇش كوتتەدجگە ايىرباستاعان. ولار تۇرعىن ءۇيدى كومپانيا باسشىسىنىڭ اتىنا قايتا راسىمدەگەن، ءبىراق قۇرىلىس كەنەتتەن توقتاعان. ءتورتىنشى جىل قاتارىنان ەرجان جۇبايىمەن، بالالارىمەن جانە قارت اناسىمەن پاتەر جالداۋعا ءماجبۇر. ول eGov-دان جەر ۋچاسكەسىنە مەنشىك قۇقىعىن راستايتىن انىقتامانى جانە الدىن الا ساتىپ الۋ-ساتۋ شارتىن كورسەتتى، ءبىراق ءۇي ءالى اياقتالماعان.
قۇرىلىس سالۋشىنىڭ كەڭسەسى تىكەلەي قۇرىلىس الاڭىنداعى تەمىر كونتەينەردە ورنالاسقان، بۇل كليەنتتەردى الاڭداتپاعان. ءقازىر كاسىپكەر تەلەفون قوڭىراۋلارىنا جاۋاپ بەرمەيدى. ۇلەسكەرلەر پوليسياعا جۇگىنگەن، اسا ءىرى كولەمدەگى الاياقتىق فاكتىسى بويىنشا قىلمىستىق ءىس قوزعالعان. كۇدىكتى حالىقارالىق ىزدەۋ جاريالانعان.
الماتى قالالىق پد رەسمي وكىلى سالتانات ازىربەك ازامات م. كۇدىكتى دەپ تانىلعانىن، سوت وعان قاماۋدا ۇستاۋ تۇرىندەگى بۇلتارتپاۋ شاراسىن سىرتتاي تاڭداعانىن راستادى. قۇقىق قورعاۋ ورگاندارى زالال مولشەرىن انىقتاپ جاتىر، وبەكتىلەرگە تىيىم سالىنعان. كىناسى دالەلدەنگەن جاعدايدا، وعان مۇلكىن تاركىلەپ، 10 جىلعا دەيىن باس بوستاندىعىنان ايىرۋ جازاسى ءقاۋىپ ءتونىپ تۇر.