اباي وبلىسىندا جۇمىس ىستەيتىن «گورنياك» التىن ءوندىرۋشى ارتەلى 2025 جىلدى 8 ملرد تەڭگە تازا پايدامەن اياقتادى، بۇل وتكەن جىلعى كورسەتكىشتەن 2،3%-عا جوعارى. بۇل قاراجات تۇپكى بەنەفيسيار — ليحتەنشتەين ازاماتى ادريان رومان رەينبەرگەرگە تيەسىلى، دەپ حابارلايدى infohub.kz سايتى.
كاسىپورىننىڭ نەگىزگى ءونىمدى وتكىزۋدەن تۇسكەن ءتۇسىمى 37،6 ملرد تەڭگەنى قۇراپ، 2024 جىلمەن سالىستىرعاندا 47%-عا ءوستى. كومپانيا «قازاقمىس كورپوراسياسىنا» التىن قۇرامدى فلوتاسيالىق كونسەنترات پەن ءسۋلفيدتى كەندى بەلگىلەنگەن باعامەن جەتكىزەدى. بۇل رەتتە ساتۋ قۇنى 24%-عا ءوسىپ، 15،8 ملرد تەڭگەنى قۇرادى.
تۇپكى پايداعا اكىمشىلىك شىعىنداردىڭ ءوسۋى ايتارلىقتاي اسەر ەتتى — ولار 2،7 ەسەگە ارتىپ، 4 ملرد تەڭگەگە جەتتى. سونىمەن قاتار، باسقا شىعىندار 3،7 ملرد تەڭگەنى قۇرادى، بۇعان دەيىن كومپانيا بۇل باپ بويىنشا كىرىس كورسەتكەن ەدى.
«گورنياك» ارتەلى اباي وبلىسىنداعى قاراجال، اقشولا جانە وڭتۇستىك اقجال كەن ورىندارىن يگەرۋگە ليسەنزيالارعا يە. كاسىپورىننىڭ ايتارلىقتاي نەسيەلىك مىندەتتەمەلەرى دە بار: 2022 جىلدىڭ قىركۇيەگىندە Bank RBK-مەن $70 ملن بالاماسى سوماعا ۇزاق مەرزىمدى نەسيە جەلىسى تۋرالى كەلىسىم جاسالعان. 2025 جىلدىڭ سوڭىنا قاراي بانك الدىنداعى قارىز 3،7 ملرد تەڭگەنى قۇرادى.
2025 جىلى كومپانيا ءوز اكسيونەرى — «اقجال گولد رەسورسيزگە» 1،2 ملرد تەڭگە كولەمىندە ديۆيدەند جاريالاپ، تولەدى. وسى قۇرىلىم جانە نيدەرلاندتىق International Private Equity Initiative B.V. ارقىلى كاسىپورىن ادريان رومان رەينبەرگەرگە تيەسىلى.
ەسكە سالايىق، 2024 جىلدىڭ قورىتىندىسى بويىنشا «اقجال گولد رەسورسيز» 7،9 ملرد تەڭگە پايدا تاپقان ەدى.