قازاقستاندا سالىق كودەكسىنە «التىن ۆيزا» يەلەرىنە جەكە جاعدايلار قاراستىراتىن وزگەرىستەر ەنگىزۋ جوسپارلانۋدا، دەپ حابارلايدى infohub.kz سايتى.
ۇلتتىق ەكونوميكا مينيسترلىگىنىڭ بۇيرىق جوباسىنا سايكەس، «التىن ۆيزا» يەلەرى مەن ولاردىڭ وتباسى مۇشەلەرى ءۇشىن ارنايى سالىق سالۋ ءتارتىبى بەلگىلەنەدى. سونداي-اق «استانا» حالىقارالىق قارجى ورتالىعىنىڭ ينۆەستورلارى ءۇشىن ق ر رەزيدەنتى مارتەبەسىن راستايتىن قۇجاتتى بەرۋ ءۇشىن 7 مىڭ اەك مولشەرىندەگى الىمدى الىپ تاستاۋ جانە ينۆەستورلاردىڭ ينفراقۇرىلىم وبەكتىلەرىن قۇرۋعا جۇمساعان شىعىندارىن سالىق تولەمدەرى ەسەبىنەن وتەۋ مۇمكىندىگىن قاراستىرۋ ۇسىنىلادى.
«سونىمەن قاتار، باسىم ينۆەستيسيالىق جوبالار مەن ينۆەستيسيا تۋرالى كەلىسىم جاساسقان تۇلعالار ءۇشىن بۇرىن قولدانىستا بولعان جەكەلەگەن سالىق سالۋ نورمالارىن قالپىنا كەلتىرۋ ۇسىنىلادى»، — دەلىنگەن قۇجاتتا.
جەكەلەگەن سالىق تەتىكتەرىن جەتىلدىرۋ ءۇشىن 2026 جىلعى 1 قاڭتاردان 2028 جىلعى 31 جەلتوقسانعا دەيىن: جەكە تۇلعالاردى قازاقستاندىق پروۆايدەرلەر ارقىلى سيفرلىق اكتيۆتەرمەن وپەراسيالاردان تۇسكەن تابىستار بويىنشا جەكە تابىس سالىعىنان بوساتۋ؛ ەكىنشى دەڭگەيدەگى بانكتەردىڭ فاكتورينگتىك جانە فورفەيتينگتىك وپەراسيالارىن ققس-تان بوساتۋ؛ تاۋارلاردى تاڭبالاۋعا ارنالعان شىعىستاردى ناقتى جۇمسالعان شىعىنداردىڭ 150% مولشەرىندە شەگەرىمگە جاتقىزۋ ۇسىنىلادى. بۇدان باسقا، ءوزىن-وزى جۇمىسپەن قامتىعاندار ءۇشىن ارنايى سالىق رەجيمىن قولدانۋ شارتتارى ناقتىلانادى، ج ش س قۇرىلتايشىلارى مەن اق اكسيونەرلەرىنىڭ ونى پايدالانۋ مۇمكىندىگى الىنىپ تاستالادى.
«ۇسىنىلعان باستامالار، سونداي-اق جوبادا قاراستىرىلعان باسقا دا تۇزەتۋلەر سالىق كودەكسىنىڭ جەكەلەگەن ەرەجەلەرىن ونى قولدانۋ تاجىريبەسىن ەسكەرە وتىرىپ ناقتى تۇزەتۋگە، اكىمشىلىك كەدەرگىلەردى ازايتۋعا جانە ينۆەستيسيالىق جانە بيزنەس بەلسەندىلىك ءۇشىن نەعۇرلىم تۇسىنىكتى جاعدايلار جاساۋعا باعىتتالعان»، — دەپ اتاپ وتىلگەن بۇيرىق ماتىنىندە.
جوبا 25 قىركۇيەككە دەيىن قوعامدىق تالقىلاۋدا. بۇعان دەيىن قازاقستاندا قازاقستاندىق كومپانيالاردىڭ كاپيتالىنا نەمەسە جەرگىلىكتى باعالى قاعازدارىنا كەمىندە 300 مىڭ دوللار ينۆەستيسيالاعان شەتەلدىكتەر ءۇشىن جاڭا «التىن ۆيزا» ەنگىزىلەتىنى حابارلانعان بولاتىن.