اليفدەك اي يۇزىڭە عيبرات1 ەتتىم،
بي، ءبالاي2 ءدارتىڭا3 ءنيسبات4 ەتتىم.
تي، ءتىلىمنان شىعارىپ ءتۇرلى ءابيات5،
سي، ءساناي6 ءمادحيا7 ءحۇرمات ەتتىم.

جەم، جامالىڭ8 قانداي اق رۋزي9 ماعان،
حا، حاليلليك10 تاپپادىم، جانىم، ءسانان.
حي، حالايىق، مەن ەمەس، ءبارى ىنتيزار،
ءدال، داريعا عيشىق وتى بەرمەس امان.

ءزال، زاليللىك11 كورگەن سوڭ، سايراي بەر، ءتىل،
رە، ريزا قىلماعىڭدى، يار12، ءوزىڭ ءبىل.
زي، ءزاھارداي13 كۇيدىردى عيشقىڭ قاتتى،
سىن، ءسالامات قالماعىم بولدى مۇشكىل.

شىن شيكار ءلاب14 ەسىمە تۇسكەن سايىن،
سات، سابىرىم قالمادى، مەن نە ءايلايىن.
زات، زايع15 ءومىرىم ءوتتى مەنىڭ بەكەر،
تاي، تالاپتان ايتەۋىر قۇر قالمايىن.

زاي، زالىم كوپ قىلىش بوپ جانعا وقتالدى،
ءعايىن، عاقىلىمدى باسىمنان تارتىپ الدى.
عايىن، عاريبلىك باسىما تۇسكەننەن سوڭ،
في، فايداڭ تيە مە دەپ جازا سالدى.

قاف، قابىل بولار ما ەكەن جازعان حاتىم،
كاف، كاميل16 اقىلىڭ، اسىل زاتىم.
ءلام، لابىڭنەن ەم قىلساڭ مەن دەرتتىگە،
مەن، مەھرىڭنەن قالماس ەد بار اپاتىم.

نون، ءنالا عىپ قايعىڭمەن كۇيدىردىڭ كوپ،
ۋاۋ، ءۋايلانا17 عيشقىڭ ۋايىم جەپ،
ھي، ھەش فايداڭ تيمەسە ءولدى ويلاڭىز،
ءلام ءاليف، ءلا ءيلاھا يلاللا18 دەپ.

يا، يارىم، قالاي بولار جاۋاپ ءسوزىڭ،
ءمات – قاسىڭ، ءتاشتيت – كىرپىك، ساكىن – كوزىڭ19.
ۇتىرمەن ءاستى-ۇستىلى جازۋدا بار،
بولۋعا ءاستى-ۇستىلى كونسەڭ ءوزىڭ.

1 عيبرات (ارابشا) – ۇلگى، ونەگە، ناقىل، ماعىنا.
2 ءبالاي (ارابشا) – پالە، قيىنشىلىق.
3 ءدارتىڭا (ءدارد) – ءتۇپ ماعىناسى اۋرۋ، ازاپ شەگۋ؛ ولەڭدەگى ماعىناسى – عاشىق بولىپ دەرتتەنۋ.
4 ءنيسبات (ارابشا) – بايلانىس، ءبىر نارسەمەن بايلانىستا بولۋ. بۇل ارادا ەم تاپتىم دەگەن دەگەن ماعىنادا.
5 ءابيات (ارابشا) – ولەڭ، جىر؛ ءبايت ءسوزىنىڭ كوپشە ءتۇرى.
6 ءساناي (ارابشا) – سۇلۋ، ادەمى، شەبەر.
7 ءماداح، ءمادحيا (ارابشا) – ماقتاۋ، ولەڭ، ودا.
8 جامال (ارابشا) – كورىك، سۇلۋلىق.
9 رۋزي (پارسىشا) – كۇن، كۇندەي.
10 ءحاليل (ارابشا) – شىن دوس، سۇيگەن جار.
11 ءزاليل (ارابشا) – ازعىن، جەكسۇرىن، قورلانعان.
12 يار (پارسىشا) – دوس، سۇيىكتى ماعىناسىندا.
13 ءزاھار (پارسىشا) – ۋ.
14 شيكار ءلاب (پارسىشا) – ءتاتتى ەرىن.
15 زايع (ارابشا) – جولدان تايۋ.
16 كاميل (ارابشا) – تولىق.
17 ءۋايلانا (ارابشا) – باقىتسىزدىق، قايعى.
18 ءلا ءيلاھا يلاللا (ارابشا) – اللادان باسقا ەشبىر ءتاڭىرى جوق.
19 بۇل ءبىر جولدا اراب جازۋىنداعى سوزدەردى دۇرىس وقۋ ءۇشىن
قويىلاتىن بەلگىلەردى كەلتىرەدى.

---