ۇلىتاۋ وبلىسى پروكۋراتۋراسى ءوز بالالارىنا اليمەنت تولەمەي، ميلليونداعان تەڭگەنى بۋكمەكەرلىك پلاتفورمالارعا جۇمساعان ونداعان بورىشكەردى انىقتادى. تەكسەرۋ كورسەتكەندەي، كەيبىرەۋلەرى ويىن شوتتارىن ۇنەمى تولىقتىرىپ، ستاۆكا جاساپ، ۇتىس الىپ وتىرعان، ءبىراق بالالارىن اسىراۋعا قاراجات اۋدارماعان. انىقتالعان دەرەكتەر بويىنشا سوتقا دەيىنگى تەرگەۋلەر باستالدى، دەپ حابارلايدى infohub.kz.
«كەزەكتى تەكسەرۋ بارىسىندا قاداعالاۋ ورگانىنىڭ قىزمەتكەرلەرى اليمەنت بويىنشا بەرەشەگى بار 22 بورىشكەردى انىقتادى. ولار اليمەنت قارىزدارىنا قاراماستان، بۋكمەكەرلىك كەڭسەلەردە ستاۆكا جاساۋعا ەلەۋلى قاراجات جۇمساۋدى جالعاستىرعان»، — دەپ مالىمدەدى وبلىس پروكۋراتۋراسى.
قاداعالاۋ ورگانىنىڭ انىقتاۋىنشا، بۇل ازاماتتار اتا-انالىق مىندەتتەرىن ورىنداماي، بالالارىنا قارىز بولعان. سونىمەن بىرگە ولار ويىن شوتتارىن ۇنەمى تولىقتىرىپ، ستاۆكالارعا قاتىسىپ، اقشالاي ۇتىستار العان.
ەڭ ايشىقتى جاعدايلاردىڭ ءبىرى — اليمەنت بەرەشەگى 3،9 ملن تەڭگەگە جەتكەن بورىشكەر. تەكسەرۋ دەرەكتەرىنە سايكەس، ول 2020 جىلدان باستاپ بۋكمەكەرلىك كەڭسەدە تىركەلگەن. وسى ۋاقىت ارالىعىندا ول ويىن شوتىن جالپى 4،6 ملن تەڭگەگە تولىقتىرعان. سونىمەن قاتار، ول كەزەڭدە 3،1 ملن تەڭگە كولەمىندە ۇتىس العان. ال ءوز بالالارىن اسىراۋعا قاراجات اۋدارماعان.
بارلىق انىقتالعان دەرەكتەر بويىنشا قازاقستان رەسپۋبليكاسى قىلمىستىق كودەكسىنىڭ بالالاردى اسىراۋعا ارنالعان قاراجاتتى تولەۋدەن جالتارۋ ءۇشىن جاۋاپكەرشىلىك كوزدەلگەن 139-بابىمەن سوتقا دەيىنگى تەرگەۋلەر باستالدى.
ۇلىتاۋ وبلىسى پروكۋراتۋراسى اتا-انالاردىڭ بالالارىن اسىراۋ مىندەتى زاڭنىڭ تىكەلەي تالابى ەكەنىن جانە ونى جەكە ءمان-جايلارعا قاراماستان ەلەمەۋگە بولمايتىنىن اتاپ ءوتتى. ۆەدومستۆو سونداي-اق ناقتى تابىستاردى جاسىرۋ، اليمەنتتىك مىندەتتەمەلەردى ورىنداۋدان جالتارۋ نە بالالاردىڭ مۇددەسىنە زيان كەلتىرىپ قاراجات جۇمساۋ زاڭدا كوزدەلگەن جاۋاپكەرشىلىككە اكەپ سوعۋى مۇمكىن ەكەنىن ەسكەرتەدى.
پروكۋراتۋرا ازاماتتاردى اتا-انالىق مىندەتتەرىن ادال ورىنداۋعا شاقىرادى، ويتكەنى بالالاردىڭ قۇقىقتارى مەن زاڭدى مۇددەلەرىن قورعاۋ قاداعالاۋ ورگاندارى جۇمىسىنىڭ باسىم باعىتتارىنىڭ ءبىرى بولىپ قالادى.