الجير ورمان مەن ەگىستىك القاپتارىن قاساقانا ورتەگەندەرگە ءولىم جازاسىن كوزدەيتىن زاڭ قابىلدادى. بۇعان دەيىن ەلدىڭ ءبىرقاتار ايماعىن شارپىعان الاپات ورتتەر بولعان ەدى، دەپ حابارلايدى infohub.kz سايتى.
ۇلتتىق جينالىس دەپۋتاتتارى بەيسەنبى كۇنى وسى زاڭ جوباسىن داۋىسقا سالىپ ماقۇلدادى. قۇجات بويىنشا بالا ۇرلاۋ دا ءولىم جازاسىنا تارتىلاتىن قىلمىس ساناتىنا ەنگىزىلدى.
ءالجيردىڭ قىلمىستىق كودەكسىندە كەيبىر قىلمىستار ءۇشىن ءولىم جازاسى بۇرىننان بار. الايدا 1993 جىلدان بەرى ەلدە بىردە-بىر ادام اتىلماعان.
رەسمي دەرەكتەرگە سايكەس، ورتتەردەن 12 ادام قازا تاپتى. ال تاۋەلسىز اقپارات قۇرالدارى بۇل كورسەتكىش الدەقايدا جوعارى دەپ ەسەپتەيدى.
سولتۇستىك افريكاداعى قاتتى ىستىق كەزەڭدە ەلدىڭ سولتۇستىك-شىعىسىندا 100-دەن استام ءورت تىركەلگەن سوڭ، الجير پرەزيدەنتى ابدەلماجيد تەببۋن ادىلەت مينيسترلىگىنە قىلمىستىق زاڭعا وزگەرىستەر ەنگىزۋدى تاپسىرعان بولاتىن.
جاڭا زاڭ بويىنشا ورماندى، توعايدى نەمەسە ەگىستىك القاپتى قاساقانا ورتەگەنى ءۇشىن سوتتالعان ادام ءولىم جازاسىنا كەسىلۋى مۇمكىن.
سونداي-اق ازاپتاۋ، جىنىستىق زورلىق نەمەسە مۇشەسىن زاقىمداۋمەن ۇشتاسقان بالا ۇرلاۋ قىلمىسىنا دا ءولىم جازاسى قاراستىرىلعان.
ادىلەت ءمينيسترى لوتفي بۋدجەماا پارلامەنتتە سويلەگەن سوزىندە: «وسى ارەكەتتەر ءۇشىن ءولىم جازاسىن قابىلداۋ — بۇل قىلمىستاردى تەجەۋدىڭ ورىندى قۇقىقتىق جاۋابى»، — دەدى. بۇل تۋرالى فرانس پرەسس اقپارات اگەنتتىگى حابارلادى.
ءمينيستردىڭ ايتۋىنشا، قاتاڭ جازانىڭ قاجەتتىلىگى ءورت قويۋ «ۇيىمداسقان قىلمىس دەڭگەيىنە» جەتكەنىمەن جانە تەرگەۋ دەرەكتەرى «شەتەلدىك تاراپتارمەن» بايلانىستى كورسەتكەنىمەن نەگىزدەلگەن.
زاڭ پرەزيدەنت رەسمي بەكىتكەنگە دەيىن ۇلت كەڭەسىندە — جوعارعى پالاتادا قارالادى.
تەرگەۋشى جۋرناليست نوزحا حەلالەف ورتتە قازا تاپقانداردىڭ ەسىمدەرىن وتباسىلار جاريالاعان قايعىلى حابارلامالار مەن جەرگىلىكتى بيلىك تاراتقان مالىمەتتەر ارقىلى جيناپ ءجۇر.
ونىڭ تاۋەلسىز Twala جاڭالىقتار سايتىندا جاريالانعان ەسەبىندە قازا تاپقاندار سانى 200 دەپ كورسەتىلگەن.
الجيردە جاز سايىن ورمان ءورتى ءجيى بولادى. الايدا كليماتتىڭ وزگەرۋى سوڭعى جىلدارداعى ورتتەردىڭ قارقىنى مەن اۋىرلىعىن كۇشەيتىپ وتىر.