ءالجيردىڭ سولتۇستىگىندە بولعان ورمان ورتىنەن كەمىندە 12 ادام قازا تاۋىپ، ونداعان ادام جاراقات الدى. بۇل تۋرالى ەلدىڭ ازاماتتىق قورعانىس قىزمەتى حابارلادى. ءورت ەلدىڭ سولتۇستىك جاعالاۋىنداعى بىرنەشە پروۆينسيانى شارپىعان.
ىشكى ىستەر ءمينيسترى سايد سايۋدتىڭ سارسەنبى كۇنى كەشكە مالىمدەۋىنشە، كەمىندە 54 ادام كۇيىك جاراقاتىن العان، ونىڭ التاۋى ءقازىر رەانيماسيادا جاتىر. بۇل قايعىلى وقيعا سولتۇستىك افريكادا تۇرعىندار قاتتى ىستىقتان زارداپ شەگىپ جاتقان كەزدە ورىن الدى. اتاپ ايتقاندا، تۋنيس پەن الجيردە اۋا تەمپەراتۋراسى وتە جوعارى.
سايۋدتىڭ ايتۋىنشا، جيجەل پروۆينسياسىندا بەس ادام، بەجاييادا ءتورت ادام جانە تيزي-ۋزۋدا ءۇش ادام قازا تاپقان. ول ءالجيردىڭ دەنساۋلىق ساقتاۋ ءمينيسترى مۇحاممەد سەدديك ايت مەسساۋدەنەمەن بىرگە بەجايياعا بارىپ، جەرگىلىكتى ءورت ءسوندىرۋ جانە ەۆاكۋاسيالاۋ جۇمىستارىن «باعالاۋدا»، دەپ حابارلادى ۇكىمەت وكىلدەرى.
ازاماتتىق قورعانىس قىزمەتى مەن جەرگىلىكتى ب ا ق مالىمەتىنشە، بەجاييا مەن جيجەلدەگى كوپتەگەن ۇيلەر ەۆاكۋاسيالانعان. جەرگىلىكتى Jijel News تەلەارناسى تاراتقان كادرلاردا تۇرعىنداردىڭ قالىڭ ءتۇتىن اراسىندا پوشتا بولىمشەسىنە پانالاعانى كورىنەدى.
ازاماتتىق قورعانىس قىزمەتى سارسەنبى كۇنى كەشكە ەل بويىنشا 69 ورتپەن كۇرەسىپ جاتقانىن حابارلادى. ءۇش جىل بۇرىن بەجاييا ايماعىندا بولعان الاپات ءورت ورمان مەن ەگىستىك جەرلەردى شارپىپ، 30 ادامنىڭ ءومىرىن قيعان ەدى. وتكەن ايدا بيلىك ورتتەن كەمىندە التى ادام قازا تاپقانىن تىركەدى، شىلدە ايىندا الجيردە 2 مىڭنان استام ءورت بولعان.
الجيردە جاز ايلارىندا ورمان ءورتى ءجيى بولىپ تۇرادى، الايدا كليماتتىڭ وزگەرۋى سوڭعى جىلدارى ورتتەردىڭ قارقىندىلىعى مەن اۋقىمىن كۇشەيتتى. دۇنيەجۇزىلىك مەتەورولوگيالىق ۇيىمنىڭ (دمۇ) مالىمەتىنشە، سولتۇستىك افريكادا توتەنشە ىستىق جيىلەپ كەتكەن. بۇل ايماق افريكانىڭ التى سۋبرەگيونىنىڭ ىشىندە ەڭ جىلدام جىلىپ كەلە جاتقان ايماق — 1991-2025 جىلدار ارالىعىندا تەمپەراتۋرا ونجىلدىقتا 0،43°C-قا ارتقان. سوڭعى زەرتتەۋلەر كورسەتكەندەي، ىستىق پەن سۋ تاپشىلىعى الجيردە جازعى ىستىقتا تۇيەلەردىڭ ءولىمىنىڭ ارتۋىنا دا اكەلىپ وتىر.