اڭىزعا اينالعان «روبوكوپ» ەكرانعا قايتا ورالادى: Prime Video ستريمينگتىك قىزمەتى سەگىز ەپيزودتان تۇراتىن سەريالعا تاپسىرىس بەردى، دەپ حابارلايدى infohub.kz سايتى.
وقيعا ورتاسىندا ۇلكەن تەحنولوگيالىق كورپوراسيا تۇرادى. ول قالا بيلىگىن پوليسيا قاتارىنا قۋاتتى روبوتتى قوسۋعا كوندىرەدى. روبوتتىڭ دەنەسىنە قايتىس بولعان پوليسەيدىڭ ساناسى يمپلانتاسيالانادى. بۇل پوليسەيدى جەرگىلىكتى تۇرعىندار قاھارمان دەپ سانايدى.
جوبانىڭ شوۋراننەرى جانە سەناريشىسى بولىپ پيتەر وككو تاعايىندالدى. اتقارۋشى پروديۋسەر قىزمەتىن رەجيسسەر دجەيمس ۆان («پيلا»، «زاكلياتيە»، «اكۆامەن») اتقارادى. جۇمىسقا 1987 جىلعى ءتۇپنۇسقا ءفيلمنىڭ تەڭ اۆتورلارى ەد نويمايەر مەن مايكل ماينەر دە قوسىلادى.
«تەحنولوگيالار، تۇلعا جانە كورپوراسيالاردىڭ شىن مانىندە كىمگە قىزمەت ەتەتىنى تۋرالى سۇراقتار بۇگىن 1987 جىلمەن سالىستىرعاندا ودان دا وزەكتى بوپ وتىر»، — دەدى دجەيمس ۆان. ونىڭ ايتۋىنشا، اۆتورلار ءتۇپنۇسقا «روبوكوپتىڭ» رۋحىن ساقتاپ، سونىمەن بىرگە جاڭا اۋديتوريا ءۇشىن وقيعانى زاماناۋي ءارى وزەكتى ەتۋگە تىرىسادى.
«روبوكوپ» فرانشيزاسى 1987 جىلى پول ۆەرحوۆەننىڭ اتتاس فيلمىمەن باستالدى. كەيىن ەكى جالعاسى، 2014 جىلعى رەبۋت، بىرنەشە سەريال، مۋلتسەريال، كوميكس جانە بەينەويىندار شىقتى.
جاڭا سەريال Amazon MGM Studios كومپانياسىنىڭ كۋلتتىك فرانشيزالاردى دامىتۋ ستراتەگياسىنىڭ ءبىر بولىگى بولادى. بۇل فرانشيزالاردىڭ قۇقىعىن كومپانيا 2022 جىلى MGM ستۋدياسىن ساتىپ العاننان كەيىن العان بولاتىن. «روبوكوپتان» باسقا، كومپانيا دجەيمس بوند الەمىن بەلسەندى دامىتىپ، MGMء-نىڭ باسقا دا تانىمال فيلمدەرى بويىنشا جاڭا جوبالارمەن جۇمىس ىستەۋدە.