Amazon قويمالارىندا ىستەگەن ءتورت بۇرىنعى قىزمەتكەر ريتەيلەردى جۇكتى ايەلدەردىڭ قۇقىعىن جۇيەلى تۇردە بۇزدى جانە كەيىن جۇمىستان شىعاردى دەپ ايىپتادى. الەۋەتتى اۋقىمدى ۇجىمدىق تالاپ ارىز برۋكلين فەدەرالدىق سوتىنا جىبەرىلدى، دەپ جازادى Ars Technica، حابارلايدى infohub.kz سايتى.
تالاپ قويۋشىلار — نيۋ-يورك قويمالارىنىڭ بۇرىنعى قىزمەتكەرلەرى، ولاردى «A Better Balance» قۇقىق قورعاۋ ۇيىمى قولداپ وتىر. ولاردىڭ ايتۋىنشا، روچەستەر مەن لانكاستەردەگى قويما باسشىلىعى ورىندىق بەرۋ، دارەتحاناعا جانە سۋعا قوسىمشا ءۇزىلىس، سونداي-اق دارىگەرگە بارۋ ۋاقىتى تۋرالى وتىنىشتەردى قابىلداماعان.
تالاپ قويۋشىلاردىڭ نۇسقاسى بويىنشا، جۇكتى قىزمەتكەرلەردىڭ قۇقىعىن قورعاۋ تۋرالى زاڭدى (PWFA) ساقتاۋدىڭ ورنىنا كومپانيا قاراپايىم سۇرانىستار ءۇشىن دە مەديسينالىق انىقتاما تالاپ ەتكەن. ءماجبۇرلى ۇزىلىستەرگە بايلانىستى Amazon-نىڭ جۇمىس ۋاقىتىن ەسەپتەيتىن اۆتوماتتاندىرىلعان جۇيەسى اقىسىز دەمالىس بالانسىنان ساعاتتاردى شەگەرىپ، تارتىپتىك جازالار مەن جۇمىستان شىعارۋعا اكەلگەن.
تالاپ قويۋشىلاردىڭ ءبىرى ۋيللامينا باركلاي اۋىر زات كوتەرۋدەن تۋىنداعان اسقىنۋلارعا بايلانىستى قويمادان تىكەلەي اۋرۋحاناعا جات قىزىلعان، الايدا بەس كۇننەن كەيىن ول جىبەرىلگەن قاتىناۋ ليميتىنەن اسىپ كەتكەنى ءۇشىن جۇمىستان شىعارىلعان. تاعى ءبىر قىزمەتكەردى ەمىزۋ بولمەلەرىندە وتكىزگەن ۋاقىتى ءۇشىن جازالاعان.
Amazon وكىلى كەللي نانتەل كومپانيا جىل سايىن جۇكتىلىككە بايلانىستى ەڭبەك جاعدايىن وزگەرتۋ تۋرالى وتىنىشتەردىڭ 99،9%-دان استامىن ماقۇلدايتىنىن، ال تالاپ قويۋشىلاردىڭ دالەلدەرىندە دالسىزدىكتەر بار ەكەنىن مالىمدەدى.
تالاپ قويۋشىلار وتەماقى تولەۋدى جانە كومپانيانىڭ ىشكى ساياساتىن ماجبۇرلەپ وزگەرتۋدى تالاپ ەتەدى.