اقش-تىڭ ايداحو شتاتىنىڭ تۇرعىنى دەۆيد راش گيننەس رەكوردتار كىتابىنا تاعى ءبىر جەتىستىگىن قوستى. بۇل جولى ول 10 پلاستيك ستاقاندى اۋدارۋ جىلدامدىعى بويىنشا الەمدىك رەكورد ورناتتى. وعان دايىندىققا شامامەن بەس اي ۋاقىت كەتتى، دەپ حابارلايدى infohub.kz سايتى.
UPI پورتالىنىڭ جازۋىنشا، باستاپقىدا بۇل سىناق ارىپتەسى الەكس ەكەۋىنىڭ اراسىنداعى دوستىق جارىس رەتىندە ويلاستىرىلعان. الايدا كەيىن ول رەسمي ارەكەتكە تولىققاندى دايىندىققا ۇلاستى.
ناتيجەگە جەتۋ ءۇشىن امەريكاندىققا ايلار بويى تاباندى جاتتىعۋ مەن مىڭداعان ءساتسىز ارەكەت قاجەت بولدى. سوڭىندا راش 10 ستاقاندى نەبارى 6،63 سەكۋندتا اۋدارىپ ۇلگەردى. وسىلايشا ول بۇرىنعى 7،57 سەكۋندتىق الەمدىك كورسەتكىشتى جاڭارتتى. تريك بارىسىندا ءار ستاقاندى لاقتىرىپ، اۋدارىپ، ونىڭ ۇستەلگە توڭكەرىلىپ قونۋىن قامتاماسىز ەتۋ كەرەك ەدى.
دەۆيد راشتىڭ ەسەبىندە ءبىر مەزگىلدە ۇستاپ تۇرعان 200-دەن استام گيننەس تيتۋلى بار. ەر ادام ءوزىنىڭ ەرەكشە پەرفورمانستارىمەن عىلىم، تەحنولوگيا، ينجەنەريا جانە ماتەماتيكانىڭ ماڭىزدىلىعىنا نازار اۋدارتادى.
جاڭا جەتىستىگىنىڭ قاراپايىمدىلىعى تۋرالى سىن پىكىرلەرگە جاۋاپ بەرگەن رەكوردسمەن سىنشىلارعا بۇل تريكتى وزدەرى قايتالاپ كورۋدى ۇسىندى.