پاريجدە امەريكاندىق ميللياردەردىڭ جالپى قۇنى شامامەن 1،3 ملن ەۋرو بولاتىن زەرگەرلىك بۇيىمدارى سالىنعان چەمودانى جوعالدى. بۇل تۋرالى infohub.kz سايتى حابارلايدى.
وقيعا ورتالىعىندا مەديسينالىق تەحنولوگيالار ساۋداسىنان بايلىق تاپقان 45 جاستاعى كاسىپكەر بار. ول 19 شىلدە كۇنى كەشكە نيسسادان رۋاسسي — شارل-دە-گولل اۋەجايىنا ۇشىپ كەلگەن. ەر ادام ەليسەي دالاسىنىڭ جانىنداعى Four Seasons قوناق ۇيىنە توقتاۋدى جوسپارلاعان. اۋەجايدا ونى جەكە اگەنتتىكتىڭ قىزمەتكەرى كۇتىپ العان، وعان باگاجدى قوناق ۇيگە جەتكىزۋ تاپسىرىلعان.
قوناق ۇيگە جەتكەن سوڭ، ەر ادام قالانى ارالاۋعا كەتكەن. كەشكە بولمەگە قايتىپ كەلگەندە، وعان تەك ەكى چەمودان جەتكىزىلگەنىن بايقاعان. ءۇشىنشىسى، ول قول جۇگى رەتىندە الىپ، اۋەجايدا اگەنتتىك قىزمەتكەرىنە ءبىرىنشى بولىپ بەرگەن چەمودانى جوعالىپ كەتكەن.
بەينەباقىلاۋ كامەرالارىنىڭ جازبالارى قوناق ءۇيدىڭ جانىنداعى كولىكتەن تەك ەكى چەمودان تۇسىرىلگەنىن كورسەتكەن. الدىن الا بولجام بويىنشا، ءۇشىنشى باگاج اۋەجايدا جوعالعان نەمەسە ۇرلانعان.
جوعالعان قۇندىلىقتاردىڭ ىشىندە قۇنى 800 مىڭ ەۋرو بولاتىن ساقينا جانە تاعى بىرنەشە زەرگەرلىك بۇيىمدار بار. زەرگەرلىك بۇيىمداردىڭ جالپى قۇنى شامامەن 1،3 ملن ەۋروعا باعالانىپ وتىر.
پوليسەيلەر ميللياردەردى كۇتىپ العان جەكە كومپانيانىڭ قىزمەتكەرىن جاۋاپقا الدى. ونىڭ تەرگەۋگە ناقتى نە ايتقانى جاريالانبايدى. كومپانيانىڭ ءوزى تۇسىنىكتەمە بەرۋدەن باس تارتتى. تەرگەۋدى فرانسۋزدىڭ ۆال-د'ۋاز دەپارتامەنتىنىڭ پوليسياسى جۇرگىزىپ جاتىر.