قازاقستاندا تاۋەلسىزدىك تاريحىندا العاش رەت اكىمشىلىك امنيستيا جاسالدى. ونىڭ اياسىندا ءبىر ايدان از ۋاقىت ىشىندە 681،7 مىڭ ازامات ءوندىرىپ الۋدان بوساتىلدى. بۇل تۋرالى باس پروكۋرور بەرىك اسىلوۆ مالىمدەدى، دەپ حابارلايدى infohub.kz سايتى.
باس پروكۋروردىڭ ناقتىلاۋىنشا، امنيستيا 1،3 ملن اكىمشىلىك ءىستى قامتىدى. بارلىعى 22،8 ملرد تەڭگە كولەمىندە ايىپپۇل كەشىرىلدى. ءتىزىم اقبتك-نىڭ 380-نەن استام بابىن قامتىدى، ونىڭ ىشىندە سالىق، كەدەن، ەكولوگيا، سانيتاريا سالالارىنداعى، سونداي-اق كاسىپكەرلىك جانە ساۋدا سالالارىنداعى قۇقىق بۇزۋشىلىقتار بار.
بەرىك اسىلوۆ امنيستيانىڭ تەك سيفرلىق تۇردە جۇزەگە اسىرىلعانىن اتاپ ءوتتى. تۇرعىندارعا ءوتىنىش جازۋ، قۇجات جيناۋ نەمەسە مەملەكەتتىك ورگاندارعا بارۋ قاجەت بولمادى. پروكۋراتۋرانىڭ اقپاراتتىق جۇيەلەرىنىڭ ۇيلەسىمدى جۇمىسى مەن ۆەدومستۆوارالىق ىنتىماقتاستىقتىڭ ارقاسىندا ىستەر بويىنشا ءىس جۇرگىزۋ اۆتوماتتى تۇردە توقتاتىلدى.
اكىمشىلىك ىستەردىڭ توقتاتىلعانى تۋرالى حابارلامالار ازاماتتارعا SMS ارقىلى كەلدى.
امنيستيا كوپتەگەن ازاماتتارعا قارجىلىق اۋىرتپالىقتان قۇتىلۋعا عانا ەمەس، سونىمەن قاتار ىلەسپە ماسەلەلەردى رەتتەۋگە مۇمكىندىك بەردى: اتقارۋشىلىق ءىس جۇرگىزۋدى اياقتاۋ، شەكتەۋلەردى جويۋ جانە بۇرىن الىنعان م ۇلىكتى قايتارۋ.
مىسال رەتىندە جەتىسۋ وبلىسىنىڭ تۇرعىنىنىڭ جاعدايى كەلتىرىلەدى. ونىڭ كولىگى جىل باسىنان بەرى ايىپپۇلداردى تولەمەگەنى ءۇشىن ارنايى تۇراققا قويىلعان ەدى. امنيستيا زاڭى كۇشىنە ەنگەننەن كەيىن ءىس جۇرگىزۋ توقتاتىلىپ، اۆتوكولىك يەسىنە قايتارىلدى.