قازاقستان ءالى دە ىستىقتان قىسىلىپ جاتىر. قازگيدرومەت ماماندارى اۋا تەمپەراتۋراسىنىڭ ەكسترەمالدى دەڭگەيگە جەتۋ سەبەبىن جانە بۇعان كليماتتىڭ وزگەرۋىنىڭ قاتىسىن ءتۇسىندىردى، دەپ حابارلايدى infohub.kz سايتى.
قازگيدرومەتتىڭ مالىمەتىنشە، ەلىمىزدىڭ كەيبىر وڭىرلەرىندە اۋا تەمپەراتۋراسى +40...+46 گرادۋسقا جەتكەن. انومالدى ىستىق ەكى فاكتوردىڭ – ۇزاق مەرزىمدى كليماتتىڭ وزگەرۋى مەن قازىرگى سينوپتيكالىق جاعدايدىڭ ۇيلەسۋىنەن پايدا بولدى. بۇل رەتتە ىستىق تولقىندارى تەك جاھاندىق جىلىنۋدان تۋىندادى دەۋ دۇرىس ەمەس.
قازگيدرومەتتە سوڭعى ونجىلدىقتار 60 جىلدىق باقىلاۋ كەزەڭىندەگى ەڭ ىستىق بولعانىن، ال 2025 جىل ەلدەگى مەتەوباقىلاۋ تاريحىنداعى ەڭ جىلى جىل بولعانىن اتاپ وتەدى.
«قازىرگى سينوپتيكالىق جاعداي قازاقستاننىڭ ۇلكەن بولىگىندە تۇراقتى انتيسيكلوننىڭ قالىپتاسۋىمەن انىقتالدى، ول بۇلتتىلىقتىڭ دامۋىنا كەدەرگى كەلتىرىپ، جەر بەتىنىڭ قارقىندى جىلىنۋىنا جانە ورتا ازيا مەن يران اۋداندارىنان قازاقستان اۋماعىنا ىستىق اۋا ماسسالارىنىڭ كەلۋىنە سەبەپ بولدى. ناتيجەسىندە كوپتەگەن وڭىرلەردە اۋا تەمپەراتۋراسى +40...+46 گرادۋسقا جەتتى»، — دەيدى قازگيدرومەتتىڭ عىلىمي-زەرتتەۋ ورتالىعىنىڭ ديرەكتورى تۇرسىن تيللاكارىم.
قازگيدرومەتتە جاھاندىق جىلىنۋ ىستىقتىڭ ءاربىر جەكە ەپيزودىنىڭ تىكەلەي سەبەبى ەمەس، ءبىراق جالپى تەمپەراتۋرالىق فوندى كوتەرەتىنىن اتاپ ءوتتى. سوندىقتان ۇقساس سينوپتيكالىق پروسەستەر بۇگىندە بىرنەشە ونجىلدىق بۇرىنعىعا قاراعاندا جوعارى تەمپەراتۋراعا اكەلەدى.
قازگيدرومەتتىڭ دەرەگىنشە، ماۋسىم ايى ەلىمىزدىڭ ورتالىق، وڭتۇستىك جانە شىعىس وڭىرلەرى ءۇشىن ەكسترەمالدى جىلى بولدى. ال قازاقستاننىڭ باتىسى كەرىسىنشە سالقىن اۋا رايىمەن سيپاتتالدى. ماۋسىمداعى ورتاشا ايلىق اۋا تەمپەراتۋراسى كليماتتىق نورمادان 1–3 گرادۋسقا جوعارى بولدى.
«2026 جىلعى شىلدەدە قازاقستاننىڭ باسىم بولىگىندە ورتاشا ايلىق اۋا تەمپەراتۋراسى كليماتتىق نورمادان 1-2 گرادۋسقا جوعارى بولادى دەپ كۇتىلۋدە. الايدا كەيبىر كۇندەرى ەڭ جوعارى كۇندىزگى تەمپەراتۋرانىڭ اۋىتقۋى ايتارلىقتاي ۇلكەن بولۋى مۇمكىن جانە ولار 5 گرادۋسقا دەيىن جەتۋى مۇمكىن. وڭىرلەر بويىنشا ايتساق، ەڭ ايقىن ىستىق وڭتۇستىك وبلىستاردا، ورتالىق قازاقستاندا، سونداي-اق قازاقستاننىڭ وڭتۇستىك-شىعىسىنىڭ كەيبىر اۋداندارىندا بايقالادى»، — دەدى تۇرسىن تيللاكارىم.
قازىرگى ىستىق بۇكىل قازاقستان ءۇشىن رەكوردتىق بولدى دەپ ايتۋ ءالى ەرتە، دەپ اتاپ ءوتتى سينوپتيكتەر. كليماتتىق رەكوردتار ءاربىر مەتەوستانسيا ءۇشىن باقىلاۋ دەرەكتەرىن تەكسەرىپ، وڭدەگەننەن كەيىن جەكە بەلگىلەنەدى.
سونىمەن قاتار مۇنداي جاعدايلار ءجيى تىركەلۋدە. سينوپتيكتەردىڭ مالىمەتىنشە، 2025 جىلى شىمكەنت، الماتى، تۇركىستان، تاراز، اقتاۋ، قىزىلوردا جانە باسقا قالالاردا تەمپەراتۋرالىق رەكوردتار جاڭارتىلدى. 2026 جىلدىڭ مامىرىندا 80 جىلدان استام ۋاقىت بويى ساقتالعان رەكوردتى قوسا العاندا، جاڭا تەمپەراتۋرالىق ماكسيمۋمدار تىركەلدى. ماۋسىم ايىندا دا جاڭا رەكوردتار تىركەلدى.
ەكسترەمالدى ىستىق كەزەڭىندە ماماندار اشىق كۇن استىندا بولۋدى، اسىرەسە ساعات 11:00-دەن 17:00-گە دەيىن شەكتەۋگە كەڭەس بەرەدى. سونداي-اق كۇندىزگى ۋاقىتتا دەنە جۇكتەمەسىن ازايتىپ، ءورت قاۋىپسىزدىگى ەرەجەلەرىن ساقتاۋ قاجەت. سينوپتيكتەر رەسمي بولجامدار مەن داۋىلدى ەسكەرتۋلەردى باقىلاپ، ىقتيمال ءقاۋىپتى اۋا رايى قۇبىلىستارى تۋرالى ۋاقتىلى ءبىلىپ وتىرۋدى ۇسىنادى.