قازگيدرومەت سينوپتيكتەرى 16، 17 جانە 18 شىلدەگە ارنالعان اۋا رايى بولجامىن ۇسىندى، دەپ حابارلايدى infohub.kz.
16-18 شىلدە ارالىعىندا سولتۇستىك-باتىس سيكلون مەن ونىمەن بايلانىستى اتموسفەرالىق فرونتتاردىڭ اسەرىنەن ەلدىڭ باتىسىندا، سولتۇستىگىندە، ورتالىعىندا جانە شىعىسىندا اۋا رايى تۇراقسىز بولادى. نايزاعايلى جاڭبىر جاۋادى، 16-17 شىلدەدە كەي جەرلەردە قاتتى جاۋىن-شاشىن كۇتىلەدى. بۇرشاق پەن داۋىلدى جەل بولۋى مۇمكىن.
جاۋىن-شاشىن اياسىندا قازاقستاننىڭ باتىسىندا ىستىق بىرتىندەپ باسىلا باستايدى. كۇندىز اۋا +22...+35°C-قا دەيىن جىليدى، سولتۇستىكتە قىسقا مەرزىمدى سالقىنداۋ بايقالادى: +21...+36°C.
ورتالىق جانە شىعىس وبلىستاردا وتە كۇشتى ىستىق ساقتالادى – +41°C-قا دەيىن.
ەڭ ىستىق اۋا رايى ەلدىڭ وڭتۇستىگىندە، وڭتۇستىك-شىعىسىندا جانە وڭتۇستىك-باتىسىنىڭ كەي جەرلەرىندە كۇتىلەدى. مۇندا ورتا ازيا ايماقتارىنان كەلەتىن ىستىق اۋا ماسسالارىنىڭ اسەرى ساقتالادى. بۇل وڭىرلەردە نەگىزىنەن قۇرعاق اۋا رايى، تەك وڭتۇستىك-شىعىستىڭ تاۋلى ايماقتارىندا قىسقا مەرزىمدى نايزاعايلى جاڭبىر مۇمكىن. كۇندىز تەمپەراتۋرا +41...+46°C-قا جەتەدى، بۇل كليماتتىق نورمادان جوعارى.
بۇعان دەيىن قازگيدرومەت سينوپتيكتەرى شىلدە ايى قازاقستاندا قاراما-قايشى بولاتىنىن حابارلاعان بولاتىن: قاتتى ىستىق كەزەڭدەرى نوسەر، نايزاعاي، داۋىلدى جەل جانە شاڭدى داۋىلدارمەن الماسىپ وتىرادى. وڭتۇستىك ايماقتاردا كەي كۇندەرى تەمپەراتۋرا +45°C-قا دەيىن جەتۋى مۇمكىن.