ەۋروپاداعى ەڭ ءىرى ارت-پاركتە قازاقستاندىق ساۋلەتشىلەر جاساعان كورتەن بولاتىنان تۇراتىن ەرەكشە ارت-نىسان — «انتي-كيىز ءۇي» پايدا بولدى. corten yurt – anti yurt دەپ اتالاتىن جوبا رەسەيدىڭ كالۋگا وبلىسىنداعى «نيكولا-لەنيۆەس» پاركىندە ءوتىپ جاتقان «ارحستويانيە» فەستيۆالىنىڭ ەكسپوزيسياسىنا ەندى، دەپ حابارلايدى infohub.kz.
بولات كيىز ءۇيدىڭ ديامەترى 5،7 مەتر، بيىكتىگى 3،3 مەتر. كوشپەندىلەردىڭ ءداستۇرلى باسپاناسى جەلدەن، جاڭبىردان جانە كۇننەن قورعاسا، «انتي-كيىز ءۇي» تابيعاتتىڭ قۇبىلىستارىنا تولىق اشىق. جاساۋشىلاردىڭ تۇسىندىرۋىنشە، كلاسسيكالىق كيىز ءۇي جەڭىل، جىلجىمالى جانە اعاشتان قۇراستىرىلسا، anti yurt ادەيى وعان قاراما-قارسى: نىسان كورتەن بولاتىنان جاسالعان، مونۋمەنتالدى سيپاتقا يە جانە بولشەكتەلەتىن قۇرىلىمدى قاراستىرمايدى.
جوبانىڭ اۆتورى — cogarts بيۋروسىندا جۇمىس ىستەيتىن ساۋلەتشى بوكەيحان قامزا. سونداي-اق جوباعا ulab ساۋلەت بيۋروسىنىڭ كومانداسى اتسالىستى. قامزانىڭ ايتۋىنشا، جوبا يدەياسى قۇرىلىستان ءبىر جىل بۇرىن پايدا بولعان. «سول كەزدە مەن قاراپايىم سۇراققا جاۋاپ بەرگىم كەلدى: كيىز ءۇي ءوز ءمانىن جوعالتپاي زاماناۋي بولا الا ما؟ ءبىز فورمانى ۇزاق ىزدەدىك، اقىرىندا جۇزدەگەن كورتەن ەلەمەنتتەرى كوزقاراسقا قاراي ۇنەمى وزگەرەتىن سۇلباعا اينالاتىن كومپوزيسيا پايدا بولدى»، — دەدى ول.
ساۋلەتشىلەردىڭ ويىنشا، كيىز ءۇيدىڭ ءبىرتۇتاس سۇلباسى جوق جانە كوزقاراس بۇرىشىنا قاراي ءپىشىنىن وزگەرتىپ تۇرادى. وسىعان بايلانىستى نىسان كەيدە مۇلدەم جوعالىپ كەتەتىندەي، كەيدە بىرتىندەپ كورىنەتىندەي اسەر قالدىرادى. سوندىقتان ونى «ەلەس» دەپ اتايدى.
جاساۋشىلاردىڭ وزدەرى ءۇشىن كۇتپەگەن جەردەن پاۆيلون ىشىندە ەرەكشە اكۋستيكالىق ەففەكت پايدا بولدى. كيىز ءۇيدىڭ مەتالل قۇرىلىمى دىبىستى شاعىلىستىرىپ، جاڭعىرىق تۋدىردى. «اشىلعاننان كەيىن ادامدار بىردەن پاۆيلون ىشىندە تۇرا باستادى. ولار كەشكە دەيىن وتىرىپ، ءان ايتتى، سويلەستى. كورشى لاگەردەن بارابانشىلار ءبىر كۇنى كەلىپ، يمپروۆيزاسيالانعان كونسەرت ۇيىمداستىردى»، — دەدى جوبا اۆتورى.
كورتەن بولاتىنىڭ تاعى ءبىر ەرەكشەلىگى — ۋاقىت وتە كەلە ونىڭ بەتى وزگەرىپ، تابيعي قورعانىش پاتينامەن قاپتالادى. كيىز ءۇي ءتان توت باسقان قوڭىر قاباتپەن جابىلىپ، ءتۇسى مەن قۇرىلىمىن وزگەرتەدى.
بۇعان دەيىن Kursiv LifeStyle العاشقى قازاقستاندىق دەلەگاسيانىڭ بلەك-روك شولىندەگى اتى اڭىزعا اينالعان Burning Man فەستيۆالىندە ۇلتتىق كيىز ءۇيدى تانىستىرعانىن جازعان بولاتىن. كوشپەندىلەردىڭ باسپاناسى ءتىپتى قۇمدى داۋىلعا توتەپ بەردى.