بيىل قازاقستاندا تىركەلگەن ەكسترەمالدى تەمپەراتۋرا بولاشاقتا ادەتتەگى قۇبىلىسقا اينالۋى مۇمكىن، دەپ حابارلايدى infohub.kz.
بۇعان دەيىن شىلدە ايىنداعى اپتاپ ىستىق بىرنەشە قالادا تەمپەراتۋرا ماكسيمۋمىن جاڭارتقانى حابارلانعان بولاتىن. شىمكەنتتە 111 جىل بويى ساقتالعان رەكورد جاڭارتىلىپ، عاسىردا العاش رەت تەرمومەترلەر 45 گرادۋستان استى. سونداي-اق تۇركىستان مەن الماتىدا دا جوعارى تەمپەراتۋرا تىركەلدى.
ادەتتە كليماتولوگتار تەمپەراتۋرا ماندەرىن انومالدى دەپ اتاۋعا اسىقپايدى، ءبىراق بيىلعى جاز ءتىپتى مامانداردى دا تاڭعالدىردى. «قازگيدرومەت» رمك ءباسپاسوز حاتشىسى ارۋجان مۇراتوۆانىڭ ايتۋىنشا، تەمپەراتۋرا انومالياسى +2،96 گرادۋستى قۇرادى، ال ەڭ جىلى 10 جىلدىڭ 9-ى XXI عاسىرعا تيەسىلى. قازاقستاندا جاز 2014 جىلدان باستاپ قاتارىنان 12 جىل بويى نورمادان جىلى بولدى. بۇكىل ەل بويىنشا 30 گرادۋستان جوعارى تەمپەراتۋرا كۇندەرىنىڭ سانى ارتىپ كەلەدى، ال باتىس جانە وڭتۇستىك ايماقتاردا ولاردىڭ سانى 10 جىل سايىن 4-7 تاۋلىككە وسەدى.
ساراپشىلار الداعى جىلدارى دا تەمپەراتۋرا رەكوردتارى تىركەلۋى مۇمكىن ەكەنىن جوققا شىعارمايدى. وڭتۇستىك ايماق تۇرعىندارى ءقازىردىڭ وزىندە مۇنداي ىستىققا ارەڭ شىداپ ءجۇر.
ىستىقتان زارداپ شەگىپ وتىرعان جالعىز ەل قازاقستان ەمەس. قىرعىزستانداعى كليماتولوگتار ورتالىق ازيادا تەمپەراتۋرا وسە بەرەتىنىن جانە بۇگىندە انومالدى بولىپ كورىنەتىن اپتاپ ىستىقتىڭ بولاشاقتا نورماعا اينالۋى مۇمكىن ەكەنىن ەسكەرتەدى. كليماتولوگ زويا كرەتوۆا: «ءبىز بۇگىندە تەك قىرعىزستاندا عانا ەمەس، بۇكىل ورتالىق ازيادا جانە بۇكىل الەمدە بايقاپ وتىرعان ەڭ ايقىن كليماتتىق قاۋىپتەردىڭ ءبىرى — جىل مەزگىلدەرىنىڭ ىعىسۋى. جىلدىڭ جىلى كەزەڭى ۇزارىپ كەلەدى. جاقسىلىق كۇتۋدىڭ قاجەتى جوق. تەمپەراتۋرا قالاي كوتەرىلسە، سولاي كوتەرىلە بەرەدى، ءتىپتى ودان دا قارقىندى» دەدى.
تەمپەراتۋرانىڭ كوتەرىلۋىن اسىرەسە ەۋروپا قاتتى سەزىنۋدە. بيىل جازدا فرانسيا، يسپانيا، پورتۋگاليا، گەرمانيا، بەلگيا جانە ۇلىبريتانيادا اۋا رايى قاۋىپتىلىگىنىڭ ەڭ جوعارى دەڭگەيى جاريالاندى.