Apple كورپوراسياسى Nvidia-نى ءبىرىنشى ورىننان ىعىستىرىپ، الەمدەگى ەڭ قىمبات كومپانيا مارتەبەسىن قايتاردى، دەپ حابارلايدى infohub.kz.
Appleء-دىڭ نارىقتىق كاپيتاليزاسياسى 4،9 تريلليون دوللارعا جەتتى، ال Nvidia-نىڭ قۇنى اكسيالاردىڭ تومەندەۋىنەن كەيىن 4،8 تريلليون دوللاردى قۇرادى. جىل باسىنان بەرى Apple اكسيالارى 20%-دان استامعا وسسە، Nvidia اكسيالارى 10%-عا جۋىق قانا ءوستى.
كوشباسشىنىڭ اۋىسۋى ينۆەستورلاردىڭ كوڭىل-كۇيىنىڭ وزگەرۋىن كورسەتەدى، دەپ اتاپ وتەدى Reuters. بۇرىن ولار نەگىزىنەن جاساندى ينتەللەكت بۋمىنان ۇتقان كومپانيالارعا ينۆەستيسيا سالسا، ءقازىر باسقا دا پەرسپەكتيۆالى تەحنولوگيالىق كومپانيالاردى ءجيى تاڭدايدى.
BRI Wealth Management ينۆەستيسيا ءبولىمىنىڭ باسشىسى توني مەدوۋستىڭ ايتۋىنشا، جاقىندا عانا Apple AI جارىسىندا ارتتا قالعان دەپ سانالسا، ءقازىر ينۆەستورلاردىڭ كوڭىل-كۇيى وزگەردى. كومپانيا باسقا IT الىپتارىنا قاراعاندا جاساندى ينتەللەكتتى دامىتۋعا از قاراجات جۇمسايدى، ءبىراق ودان اقىلى قىزمەتتەر، ءوزىنىڭ ەكوجۇيەسى جانە قۇرىلعىلاردى جاڭارتۋ ارقىلى تابىس تابادى. ساراپشىنىڭ پىكىرىنشە، Apple كاپيتاليزاسياسىنىڭ ءوسۋى ينۆەستورلاردىڭ كومپانيانىڭ ۇزاق مەرزىمدى پەرسپەكتيۆادا تۇراقتى پايدا الۋ قابىلەتىنە دەگەن سەنىمىن كورسەتەدى، تەك AI اينالاسىنداعى اجيوتاج ەمەس.
Apple الەمدەگى ەڭ قىمبات كومپانيا اتانىپ وتىرعانى ءبىرىنشى رەت ەمەس. ول 2011 جىلى-اق نارىقتىق كاپيتاليزاسيا بويىنشا الەمدىك رەيتينگتى باسقاردى، ال 2018 جىلى تاريحتا ءبىرىنشى بولىپ كاپيتاليزاسياسى ءبىر تريلليون دوللارعا جەتتى. 2016 جىلى كوشباسشىلىق قىسقا مەرزىمگە Alphabet-كە ءوتتى، ال 2024 جىلى جاساندى ينتەللەكتكە ارنالعان چيپتەرگە جوعارى سۇرانىس اياسىندا Nvidia ءبىرىنشى ورىنعا يە بولدى.