بيىل جازدا قازاقستان اپتاپ ىستىقتان قىسىلىپ جاتىر. وڭتۇستىكتە كەي جەرلەردە تەمپەراتۋرا 40–45 گرادۋسقا دەيىن كوتەرىلەدى. قۇرعاقشىلىق ەگىنگە زيان كەلتىرە مە، ال ونىڭ سالدارى ازىق-ت ۇلىك باعاسىنا اسەر ەتە مە؟ وسى سۇراقتارعا اۋىل شارۋاشىلىعى ۆيسە-مينيسترى ازات سۇلتانوۆ جاۋاپ بەردى، دەپ حابارلايدى infohub.kz سايتى.
ازات سۇلتانوۆتىڭ ايتۋىنشا، ەلدىڭ وڭتۇستىگىندە سۋارۋ ماسەلەسى ازىرگە جوق. اگراريلەرگە سۋ كەستە بويىنشا بەرىلىپ جاتىر، سوندىقتان اۋىل شارۋاشىلىعى مينيسترلىگى سۋارمالى جەرلەردە وسىرىلەتىن كارتوپ پەن كوكونىسكە قاتىستى الاڭدامايدى. استىق وڭىرلەرىندە جاعداي كۇردەلىرەك. دەگەنمەن قوستاناي مەن سولتۇستىك قازاقستان وبلىسىنىڭ باسىم بولىگىندە جاۋعان جاڭبىر اپتاپتىڭ اسەرىن جەڭىلدەتۋگە كومەكتەستى.
«96% ەگىستىكتىڭ جاعدايى جاقسى جانە قاناعاتتانارلىق دەپ باعالانادى. ءولى ەگىن جوقتىڭ قاسى. اقمولا جانە قاراعاندى وبلىستارى بويىنشا قاراپ وتىرامىز. ناقتى كورىنىس وراققا جاقىنداعاندا كورىنەدى»، — دەدى سۇلتانوۆ.
سونىمەن قاتار، ۆيسە-مينيستردىڭ قوسۋىنشا، فەرمەرلەر قۇرعاقشىلىققا دايىندالعان: ولار ىستىققا ءتوزىمدى تۇقىم سورتتارى مەن مينەرالدى تىڭايتقىشتاردى پايدالانعان.
اشم مويىنداعانداي، از ەگىن ادەتتە استىق باعاسىن كوتەرەدى. بۇل الەۋمەتتىك ماڭىزى بار ونىمدەردىڭ وزىندىك قۇنىنا دا اسەر ەتۋى مۇمكىن. دەگەنمەن بيلىك ناننىڭ كۇرت قىمباتتاۋىن ازىرگە كۇتپەيدى.
«ءتورت جىل بۇرىنعىداي تونناسى 180 مىڭ تەڭگە بولعان كەزدە دە، قازىرگى 90 مىڭ تەڭگە باعاسىندا دا الەۋمەتتىك نان سورەدە 110 تەڭگەدەن ساتىلۋدا. بۇل باعانى ساقتاۋ ءۇشىن مەملەكەتتە بارلىق قاجەتتى تەتىكتەر بار. سوندىقتان نانسىز قالامىز با نەمەسە نان قىمباتتاي ما دەپ الاڭداۋ ءالى ەرتە. دۇربەلەڭنىڭ قاجەتى جوق»، — دەپ ۆيسە-مينيستر سەندىردى.
ەگەر ەگىن جاعدايى كۇرت ناشارلاسا، باعانى تەجەۋ شارالارىن قولداناتىنىن ايتتى.
اۋىل شارۋاشىلىعى مينيسترلىگىندە ءقازىر ەگىستىكتىڭ جاپپاي ءولۋى بايقالمايتىنىن ايتادى. اپتاپتىڭ ەگىنگە تيگىزگەن اسەرىن تولىق باعالاۋ وراق باسىنا جاقىنداعاندا مۇمكىن بولادى.