اق ۇيدە ترامپ پەن زەلەنسكيدىڭ جابىق كەلىسسوزى ءوتىپ جاتىر،-دەپ حابارلايدى ينفوحاب.كز.
اقش پرەزيدەنتى دونالد ترامپ اق ۇيدە ۋكراينا باسشىسى ۆلاديمير زەلەنسكيدى رەسمي تۇردە قابىلدادى. قوناعىن ءوۆالدى كابينەتتە كۇتىپ العان ترامپ ەكەۋارا ءباسپاسوز الدىندا ءسوز سويلەپ، جۋرناليستەردىڭ سۇراقتارىنا جاۋاپ بەردى.
امەريكالىق ليدەردىڭ ايتۋىنشا، ۆاشينگتون كيەۆكە «بەرىك ءارى سەنىمدى قاۋىپسىزدىك كەپىلدىكتەرىن» ۇسىنباق. ول ۋكراينانى قولداۋ ىسىندە ەۋروپا ەلدەرىنىڭ جاۋاپكەرشىلىگى جوعارى ەكەنىن ەسكەرتتى. دەگەنمەن، اقش تا ەلەۋلى ۇلەس قوسپاق. ءبىراق ناقتى قانداي كومەكتىڭ قاراستىرىلىپ وتىرعانىن ترامپ اشىپ ايتپادى.
رەسمي بولىمنەن كەيىن ەكى مەملەكەت باسشىسى جابىق ەسىك جاعدايىندا كەلىسسوز جۇرگىزۋگە كىرىستى. اق ءۇي دەرەگىنشە، كەزدەسۋدە قاقتىعىستى توقتاتۋ جانە قاۋىپسىزدىك ارحيتەكتۋراسى تالقىلانۋدا.
سونىمەن قاتار، ترامپ اڭگىمە بارىسىندا جاقىن ارادا رەسەي پرەزيدەنتى ۆلاديمير پۋتينمەن تەلەفون ارقىلى سويلەسەتىنىن جاريا ەتتى. بۇل مالىمدەمە حالىقارالىق قاۋىمداستىقتىڭ نازارىن اۋدارىپ وتىر.