امەريكا قۇراما شتاتتارى پالەستينا پرەزيدەنتى ماحمۇد ابباسقا نيۋ-يوركتە وتەتىن بىرىككەن ۇلتتار ۇيىمى باس اسسامبلەياسىنىڭ وتىرىسىنا قاتىسۋعا مۇمكىندىك بەرەتىن ۆيزانى ەكىنشى جىل قاتارىنان بەرمەدى، دەپ حابارلايدى infohub.kz سايتى.
اقش مەملەكەتتىك دەپارتامەنتى رەسمي سايتىندا باس تارتۋ سەبەپتەرىن ءتۇسىندىردى. «مەملەكەتتىك دەپارتامەنت كونگرەسكە پالەستينانى ازات ەتۋ ۇيىمى مەن پالەستينا اۆتونومياسى 1989 جىلعى پاەۇ مىندەتتەمەلەرىن ورىنداۋ تۋرالى زاڭدا جانە 2002 جىلعى تاياۋ شىعىستاعى بەيبىتشىلىك مىندەتتەمەلەرى تۋرالى زاڭدا جازىلعان ءوز مىندەتتەمەلەرىن تاعى دا ورىنداماعانىن مالىمدەدى. مىندەتتەمەلەردىڭ ورىندالماۋى حالىقارالىق ۇيىمداردا بۇرىن قابىلدانعان، قاۋىپسىزدىك كەڭەسىنىڭ 242 جانە 338 رەزوليۋسيالارىن قولداۋعا قاتىستى مىندەتتەمەلەرگە قايشى كەلەتىن ارەكەتتەردى باستاۋ مەن قولداۋدى، يزرايل-پالەستينا قاقتىعىسىن ينتەرناسيونالداندىرۋ جونىندەگى ارەكەتتەردى، ونىڭ ىشىندە حالىقارالىق قىلمىستىق سوت پەن بۇۇ حالىقارالىق سوتى ارقىلى جاسالعان قادامداردى، ءبىرجاقتى مويىنداۋعا قول جەتكىزۋ ارقىلى كەلىسسوزدەردى اينالىپ ءوتۋ ارەكەتتەرىن، سونداي-اق تەرروريستەرگە جاردەماقى تولەۋدى جالعاستىرۋدى جانە جاريا مالىمدەمەلەر مەن مەكتەپ وقۋلىقتارىندا تەرروريزم اكتىلەرى مەن تەرروريستەردى دارىپتەۋدى قامتيدى»، — دەلىنگەن سىرتقى ساياسات ۆەدومستۆوسىنىڭ حابارلاماسىندا.
وسىعان بايلانىستى امەريكا قۇراما شتاتتارى پالەستينانى ازات ەتۋ ۇيىمىنىڭ مۇشەلەرى مەن پالەستينا اۆتونومياسىنىڭ لاۋازىمدى تۇلعالارىنا ۆيزا بەرۋگە تىيىم سالاتىن سانكسيالاردى كەڭەيتەتىنى ناقتىلاندى.
Anadolu اگەنتتىگىنىڭ حابارلاۋىنشا، 2025 جىلى پالەستينا اۆتونومياسىنىڭ پرەزيدەنتى ماحمۇد ابباس تا ۆيزا بولماعاندىقتان باس اسسامبلەياعا جەكە قاتىسا الماي، جينالعاندارعا ونلاين رەجيمدە ءسوز سويلەگەن.