اقش-تا سوت «كروكۋس سيتي حولل» تەراكتىنە جانە باسقا دا لاڭكەستىك ارەكەتتەرگە قاتىسى بار افعان سودىرى مۇحاممەد شاريفۋللاعا ۇكىم شىعاردى. بۇل تۋرالى اقش ادىلەت مينيسترلىگى حابارلادى، دەپ جازادى infohub.kz.
ۆەدومستۆو مالىمەتىنشە، قازاقستاندا تىيىم سالىنعان يگيل («يسلام مەملەكەتى») ۇيىمىنىڭ مۇشەسى مۇحاممەد شاريفۋللا لاڭكەستىك قۇرىلىمدى ماتەريالدىق قولداعانى جانە وعان رەسۋرس بەرگەنى ءۇشىن 20 جىلعا باس بوستاندىعىنان ايىرىلدى.
اقش ادىلەت مينيسترلىگىنىڭ دەرەگىنشە، 2024 جىلدىڭ ناۋرىزىندا «كروكۋس سيتي حولل» تەراكتى بولعان كەزدە شاريفۋللا يگيل اتىنان شابۋىلداۋشىلارعا اك اۆتوماتى مەن باسقا دا قارۋدى قولدانۋ جونىندە نۇسقاۋلىق بەرىپ، شابۋىل بارىسىندا ولارمەن بايلانىستا بولعان.
سونىمەن قاتار شاريفۋللا 2021 جىلى اقش اسكەرلەرى اۋعانستاننان شىعارىلعان كەزدەگى كابۋلداعى جارىلىسقا جانە باسقا دا ءبىرقاتار لاڭكەستىك ارەكەتتەرگە قاتىسى بار.
2024 جىلدىڭ 22 ناۋرىزىندا كەشكە رەسەي فسب-سى ماسكەۋ وبلىسىنداعى كراسنوگورسك قالاسىنداعى «كروكۋس سيتي حولل» عيماراتىندا اتىس پەن ءورت بولعانىن حابارلادى. ول كەزدە مۇندا «پيكنيك» توبىنىڭ كونسەرتى ءوتۋى ءتيىس ەدى. تەرگەۋ كوميتەتى تەراكت تۋرالى قىلمىستىق ءىس قوزعادى.
24 ناۋرىزدا رەسەيدە جالپىۇلتتىق ازا تۇتۋ كۇنى جاريالاندى. «كروكۋستاعى» زارداپ شەككەندەر سانى 551 ادام، 144 ادام قازا تاپتى.
وسى جىلدىڭ ناۋرىزىندا سوت «كروكۋس سيتي حولل» تەراكتى ءىسى بويىنشا 19 ايىپتالۋشىنىڭ 15ء-ىن ءومىر بويىنا باس بوستاندىعىنان ايىرۋعا ۇكىم شىعاردى — ءىستى ەكىنشى باتىس وكرۋگتىك اسكەري سوت قارادى.