امەريكا قۇراما شتاتتارى قىركۇيەك ايىنىڭ سوڭىنا دەيىن يراك اۋماعىنان اسكەري كونتينگەنتىن تولىق شىعارىپ، تاياۋ شىعىستاعى وسى ەلدەگى جيىرما جىلدىق اسكەري قاتىسۋىن توقتاتپاق. بۇل تۋرالى infohub.kz سايتى حابارلايدى.
Deutsche Welle اگەنتتىگىنىڭ مالىمەتىنشە، 30 قىركۇيەكتە اقش يراكتا قالعان 2 500 اسكەري قىزمەتكەرىن شىعارىپ ءبىتىرۋى ءتيىس. ءتيىستى كەلىسىم 2024 جىلى جاسالعان بولاتىن.
«1 قازان يراك مەملەكەتى تاريحىنداعى جاڭا كۇنگە اينالادى. وسى كۇنى ەل كەز كەلگەن شەتەلدىك اسكەري قاتىسۋدان ارىلىپ، ءوز اۋماعىندا ۇلتتىق ەگەمەندىك ورنايدى»، — دەدى يراك پرەمەر-مينيسترى ءالي از-زەيدي.
بۇل وقيعانى تاۋەلسىزدىك كۇنى رەتىندە اتاپ ءوتۋ جوسپارلانىپ، ول ءتورت رەسمي مەملەكەتتىك مەرەكەمەن قاتار جۇرمەك.
باسىلىمنىڭ جازۋىنشا، اسكەردى شىعارۋ اقش-تىڭ يراكتاعى جيىرما جىلدان استام اسكەري قاتىسۋىنىڭ اياقتالۋىن بىلدىرەدى. 2003 جىلى اقش باسىپ كىرگەننەن كەيىن امەريكان اسكەرلەرى 2011 جىلى شىعارىلعان، الايدا 2014 جىلى «يسلام مەملەكەتى» توبىنا قارسى كۇرەسۋ ءۇشىن قايتا ورالعان. اسكەردى شىعارۋ سونىمەن قاتار اقش-تىڭ تاياۋ شىعىستاعى قاتىسۋىن قىسقارتۋ جونىندەگى كەڭ اۋقىمدى ستراتەگياسىنىڭ ءبىر بولىگى.
South China Morning Post گازەتىنىڭ جازۋىنشا، يراكتا امەريكان اسكەرلەرىنىڭ تۇپكىلىكتى شىعارىلۋىن ءبارى قولدامايدى، ونى مەرزىمىنەن بۇرىن دەپ سانايدى.
«ءبىزدىڭ ويىمىزشا، يراك قاۋىپسىزدىكتى قامتاماسىز ەتۋ جاۋاپكەرشىلىگىن تولىق ءوز موينىنا الۋعا ءالى دايىن ەمەس»، — دەدى فاللۋدجاداعى سۇننيتتىك تايپا كوسەمى ابدۋلراحمان ءال-زوباي.