امەريكا قۇراما شتاتتارى مەن يران يسلام رەسپۋبليكاسى دۇيسەنبىدە، 28 قىركۇيەكتە جاناما كەلىسسوزدەردىڭ كەزەكتى كەزەڭىن وتكىزۋى مۇمكىن. بۇل تۋرالى ايماقتاعى ەكى دەرەككوزگە سىلتەمە جاساعان Axios پورتالى حابارلادى. ال اقش پرەزيدەنتى دونالد ترامپ باسىلىمعا بەرگەن سۇحباتىندا تەگەرانمەن بايلانىستى وسى اپتادا جالعاستىرۋعا ۇمىتتەنەتىنىن مالىمدەدى، دەپ جازادى infohub.kz.
Axios مالىمەتىنشە، تاراپتار اراسىندا دەلدالدىق ءرولدى ءالى دە كاتار اتقارىپ وتىر. دۇيسەنبىدە-اق قاتارلىق وكىلدەر يراننىڭ سىرتقى ىستەر ءمينيسترى ابباس اراكچيمەن جانە اقش پرەزيدەنتىنىڭ ارنايى وكىلى ستيۆ ۋيتكوففپەن جەكە كەزدەسۋلەر وتكىزۋى ىقتيمال. الايدا كەلىسسوزدەردىڭ جاڭا كەزەڭىنىڭ ناقتى كۇنى ازىرگە راستالعان جوق.
«مەن وسى اپتادا يرانمەن جاڭا كەلىسسوزدەردى كۇتىپ وتىرمىن. ولار كەلىسىم جاساسقىسى كەلەدى، ءبىراق ماعان قاجەت كەلىسىمدى ەمەس، باسقاسىن ۇسىنىپ وتىر»، — دەپ كەلتىرەدى Axios ترامپتىڭ سوزدەرىن.
امەريكا پرەزيدەنتى يرانعا سوققى بەرۋدى قايتا باستاۋ نۇسقاسىن دا قاراستىرىپ جاتقانىن اڭعارتتى. ءجۋرناليستىڭ ءتيىستى ساۋالىنا جاۋاپ بەرە وتىرىپ، ول «بۇل تۋرالى ءاردايىم ويلايتىنىن» ايتتى.
الدىڭعى جاناما كەلىسسوزدەر وتكەن اپتادا نيۋ-يوركتە، بىرىككەن ۇلتتار ۇيىمى باس اسسامبلەياسىنىڭ الاڭىندا وتكەن بولاتىن. وعان اراكچي، ۋيتكوفف جانە دجارەد كۋشنەر قاتىسىپ، قاتارلىق وكىلدەر يراندىق جانە امەريكاندىق تاراپتار اراسىندا حابارلاما جەتكىزىپ وتىردى.
تەگەران ءبىر اپتا ىشىندە ورمۋز بۇعازىن اشىپ، يادرولىق باعدارلاما بويىنشا كەلىسسوزدەردى قايتا باستاۋدى ۇسىندى. بۇعان اقش تەڭىز بلوكاداسىن الىپ تاستاپ، يران مۇنايىن ساتۋعا قويىلعان شەكتەۋلەردى جويىپ، ايماقتاعى اتىستى توقتاتۋ رەجيمىن قالپىنا كەلتىرۋى شارت. ترامپ بۇل ۇسىنىستان باس تارتقانىن حابارلادى. ۆاشينگتون يراننىڭ يادرولىق ماسەلەدەگى جەڭىلدىكتەرىن تالاپ ەتىپ وتىر، ال تەگەران كەلىسسوزدەردى ورمۋز بۇعازى مەن امەريكاندىق بلوكاداعا شوعىرلاندىرعىسى كەلەدى.
ترامپتىڭ باس تارتۋىنا قاراماستان، دەلدالدار ەكى تاراپپەن دە ىقتيمال ىمىرانى تالقىلاۋدى جالعاستىرىپ وتىر. اراكچي يران ديپلوماتيالىق شەشىمگە مۇددەلى ەكەنىن جانە اقش-تىڭ دەلدالدار ارقىلى رەسمي جاۋابىن كۇتىپ جۇرگەنىن مالىمدەدى.