امەريكا قۇراما شتاتتارى يرانعا جاڭا ۇسىنىس جاسادى: ۆاشينگتون تەگەراندى يادرولىق وتىنمەن قامتاماسىز ەتۋگە دايىن، ءبىراق ول ءۇشىن يران ءوزىنىڭ ۋران بايىتۋ باعدارلاماسىنان باس تارتۋى ءتيىس. بۇل تۋرالى Bloomberg اگەنتتىگىنە بەرگەن سۇحباتىندا اقش ەنەرگەتيكا ءمينيسترى كريس رايت ايتتى، دەپ حابارلايدى infohub.kz سايتى.
«ءبىز (يرانعا — رەد. ەسك.) (يادرولىق — رەد. ەسك.) وتىندى شەتەلدەن جەتكىزە الامىز. ولار قايتادان ۇلتتار قاۋىمداستىعىنا قوسىلىپ، حالقىنا بەيبىتشىلىك پەن وركەندەۋ اكەلە الار ەدى»، — دەدى رايت.
ونىڭ ايتۋىنشا، امەريكا قۇراما شتاتتارى ءوزىنىڭ ۋران جەتكىزۋ تىزبەگىن قۇرۋدى ءىس جۇزىندە اياقتاعان. ەنەرگەتيكا ءمينيسترى ءوز ۆەدومستۆوسى ۋران ءوندىرۋ جانە سەرىكتەستىك قارىم-قاتىناس سالاسىنداعى ۇزاق مەرزىمدى كەلىسىمدەردى دايىنداۋدى اياقتاپ جاتقانىن اتاپ ءوتتى.
«ءبىز كەلىسسوز جۇرگىزۋدى قالايمىز. ايتپەسە ولار وزدەرىنىڭ جاسىرىن، قۇپيا، جابىق يادرولىق قارۋ جاساۋ باعدارلاماسىن جالعاستىرىپ، امەريكالىق اسكەريلەرگە قارسى تۇرا الادى. بۇل ولاردىڭ يادرولىق قارۋ جاسامايتىنىنا كەپىلدىك بەرەدى»، — دەپ قوستى رايت.
سونىمەن قاتار اقش ەنەرگەتيكا مينيسترلىگىنىڭ باسشىسى مۇناي نارىعىنىڭ قاتىسۋشىلارىن ورمۋز بۇعازىنداعى احۋالعا قاتىستى شامادان تىس وپتيميزمنەن ساقتاندىردى. ونىڭ ايتۋىنشا، جاقىن ارادا يرانمەن قارىم-قاتىناستا ديپلوماتيالىق سەرپىلىس كۇتۋگە بولمايدى. قازىرگى تاڭدا بۇعاز ارقىلى تاۋلىگىنە شامامەن 10 ملن باررەل مۇناي مەن مۇناي ونىمدەرى وتەدى، بۇل بالامالى قۇبىرلاردى ەسكەرگەندە داعدارىسقا دەيىنگى كولەمنىڭ ۇشتەن ەكىسىن عانا قۇرايدى. مينيستر الەمدىك ەنەرگيا تاسىمالداۋشىلار نارىعىنىڭ قازىرگى جاي-كۇيى اسا تۇراقسىز جانە كۇردەلى بولىپ قالا بەرەتىنىن اتاپ ءوتتى.
ەسكە سالايىق، بۇعان دەيىن دونالد ترامپ يراندا ەشقاشان يادرولىق قارۋ بولمايتىنىن مالىمدەپ، ورمۋز بۇعازى اشىلماسا، جاڭا سوققىلار جاسالاتىنىن ەسكەرتكەن بولاتىن.