جۇڭگو مەن اقش جالپى قۇنى شامامەن 60 ميلليارد دوللارلىق تاۋارلارعا ءوزارا كەدەن باجىن ازايتۋعا كەلىستى. بۇل ۋاعدالاستىق جۇڭگو ءتوراعاسى سي سزينپين مەن اقش پرەزيدەنتى دونالد ترامپتىڭ ۆاشينگتونداعى كەزدەسۋىنىڭ ناتيجەسىندە جاسالدى، دەپ حابارلايدى infohub.kz سايتى.
Reuters اگەنتتىگىنىڭ مالىمەتىنشە، كەلىسىلگەن تىزىمدەرگە امەريكاندىق ازىق-ت ۇلىك پەن قىتايلىق تۇرمىستىق تاۋارلار ەنگەن. جاڭا مولشەرلەمەلەر ەكى ەل دە قاجەتتى ىشكى راسىمدەردى اياقتاعاننان كەيىن قولدانىلا باستايدى.
ءار مەملەكەت يمپورتقا سالىناتىن باجىن شامامەن 30 ميلليارد دوللارعا ازايتادى. جۇڭگو ساۋدا مينيسترلىگىنىڭ دەرەگىنشە، كەلىسىلگەن تىزىمدەگى تاۋارلاردىڭ 90%-دان استامى قوسىمشا ءوزارا باجداردان بوساتىلادى. الايدا ۆەدومستۆو جاڭا مولشەرلەمەلەردىڭ كۇشىنە ەنەتىن كۇنىن ازىرگە اتاعان جوق.
جۇڭگو امەريكاندىق جۇگەرى، بيداي، سورگو، ەت، ءسۇت ونىمدەرى، بالىق جانە تەڭىز ونىمدەرىنە باج سالىعىن تومەندەتۋدى جوسپارلاپ وتىر. تىزىمدە سونداي-اق اعاش، كوسمەتيكا جانە مەديسينالىق بۇيىمدار بار. اقش-تىڭ قىتايعا ەكسپورتىنداعى نەگىزگى تاۋارلاردىڭ ءبىرى — سويا بۇرشاعى تىزىمگە ەنبەدى.
اقش ءوز تاراپىنان قىتايلىق كوفەقايناتقىشتار، توستەرلەر، ىدىس-اياق، كورپە، توسەك جابدىعى مەن ويىنشىقتارعا باج سالىعىن ازايتۋدى ۇسىنىپ وتىر. تىزىمدە بالالارعا ارنالعان اۆتوكرەسلولار مەن مەرەكەلىك بەزەندىرۋلەر دە بار.
باج جونىندەگى ۋاعدالاستىق ەكى ەل باسشىلارىنىڭ كەزدەسۋىنىڭ ناتيجەلەرىنىڭ ءبىرى بولدى. تاراپتار سونداي-اق ساۋدا ءبىتىمىن ەكى ايعا — 2027 جىلعى 10 قاڭتارعا دەيىن ۇزارتتى. ول تاريفتىك جانە وزگە دە ساۋدا شارالارىنىڭ ءبىر بولىگىن توقتاتا تۇرۋدى كوزدەيدى.
جۇڭگو ساۋدا مينيسترلىگى كەلىسىمدى ۇزارتۋ ەلدەرگە قول جەتكىزىلگەن ۋاعدالاستىقتاردى باعالاۋعا جانە كەلىسسوزدەردى جالعاستىرۋعا ۋاقىت بەرەتىنىن ەسەپتەپ وتىر. ۆەدومستۆونىڭ ايتۋىنشا، بۇل كومپانيالار ءۇشىن «سالىستىرمالى تۇردە تۇراقتى ءارى بولجامدى جاعداي» جاسايدى.
اقش سونداي-اق قىتايدىڭ 2027 جانە 2028 جىلدارى جىل سايىن كەمىندە 10 ميلليون توننا امەريكاندىق كومىر ساتىپ الاتىنىن مالىمدەدى. ەلدەر 2026 جىلدىڭ سوڭىنا دەيىن اۋىل شارۋاشىلىعى ونىمدەرى ساۋداسى جونىندەگى جۇمىس توبىنىڭ العاشقى وتىرىسىن وتكىزۋدى جوسپارلاپ وتىر.