اقش-تاعى فەدەرالدىق سوت ICE قىزمەتكەرلەرى اتىپ تۇسىرگەن DoorDash جۇرگىزۋشىسى ۆيلبەر گارسەس پەرەستىڭ دەپورتاسياسىنا ۋاقىتشا تىيىم سالدى، دەپ حابارلايدى infohub.kz سايتى.
گارسەس پەرەستىڭ يمميگراسيالىق ىستەر جونىندەگى ادۆوكاتى كەيت لينكولن-گولدفينچ ونى ەلدەن شىعارۋعا جول بەرمەۋ ءۇشىن ۋاقىتشا شەكتەۋ قاۋلىسىن شىعارۋ تۋرالى فەدەرالدىق سوتقا تالاپ قويعان. سۋديا ونىڭ كليەنتى 30 قىركۇيەكتە جەكە ءوزى كەلۋگە ءتيىس دەپ شەشىم شىعارعاندىقتان، ول وسى كۇنگە دەيىن دەپورتاسيالانبايدى.
«ازىرگە ءىسى قارالىپ جاتقان كەزدە ونى دەپورتاسيالاۋعا ۋاقىتشا تىيىم سالدىق»، — دەپ جازدى لينكولن-گولدفينچ الەۋمەتتىك جەلىدە.
«بۇل — ماڭىزدى قادام، ءبىراق جۇمىسىمىز ءالى بىتپەدى، — دەپ جازدى ول. — ۆيلبەر ءالى دە ءتيىستى مەديسينالىق كومەككە مۇقتاج، ءبىز ونىڭ قۇقىقتارىن قورعاۋ جولىندا كۇرەسۋدى جالعاستىرامىز».
لينكولن-گولدفينچتىڭ ايتۋىنشا، وق تيگەن وقپان سۇيەگىن سىندىرعان، ول قولىن بايلاپ ءجۇر، ال دەنەسىندە ايتارلىقتاي ءىسىنۋ مەن اۋىرسىنۋ بار.
ول قوزعالىس قابىلەتىنەن ايىرىلۋىنىڭ سەبەبى مەن دارەجەسى ءالى انىقتالماعانىن ايتتى.
تەحاس شتاتىنداعى اقش پروكۋرورى كەڭسەسىنىڭ وكىلى بۇل ءىس جونىندە تۇسىنىكتەمە بەرۋدەن باس تارتتى.
لينكولن-گولدفينچ بۇعان دەيىن بي-بي-سيگە قاماۋ ورنىندا قولىن قوزعالتا الماعان سوڭ گارسەس پەرەس دۇيسەنبى كەشكە اۋرۋحاناعا قايتا جەتكىزىلگەنىن ايتقان. وندا ەم قابىلداعان ول كەيىن قاماۋ ورنىنا قايتارىلعان.
ونىڭ ايتۋىنشا، جاراقاتىنا قاراماستان، تاسىمالداۋ كەزىندە وعان كىسەن سالىنىپ، اياعى شىنجىرلانعان، بەلىنە بەلدىك بايلانعان جانە وعان ورەسكەل قاراعان. لينكولن-گولدفينچ قاماۋ مەكەمەسىنىڭ قىزمەتكەرلەرى ونىڭ بايلانىس قۇقىعىنان ايىرعانىن جانە ونى مەدپۋنكتتەن جازىق، رەتتەلمەيتىن توسەگى بار وقشاۋلانعان بولمەگە كوشىرگەنىن قوسىپ ايتتى. بي-بي-سي تۇسىنىكتەمە الۋ ءۇشىن اقش ىشكى قاۋىپسىزدىك دەپارتامەنتىنە حابارلاسقان.