امەريكا قۇراما شتاتتارى جەمقورلىققا قاتىسى بار شەتەلدىك ازاماتتارعا ۆيزا بەرۋگە جاڭا شەكتەۋلەر قويدى. بۇل تۋرالى اقش مەملەكەتتىك دەپارتامەنتى مالىمدەمە جاريالادى، دەپ حابارلايدى infohub.kz سايتى.
قۇجاتتا ترامپ اكىمشىلىگى كەزىندە جەمقور شەتەلدىك شەنەۋنىكتەردىڭ امەريكا قۇراما شتاتتارىنا ەركىن كىرە المايتىنى اتاپ وتىلگەن. مالىمدەمەدە ايتىلعانداي، بۇگىن مەملەكەتتىك دەپارتامەنت دورالداعى سامميتتە قابىلدانعان جانە 22 قىركۇيەكتەگى «امەريكا قالقانى» ەلدەرى كوشباسشىلارىنىڭ مالىمدەمەسىندە راستالعان، بۇكىل جارتى شارداعى دەموكراتيالىق باسقارۋدى جەمقورلىق پەن ناشاقورلىقتان قورعاۋ مىندەتتەمەلەرىن ورىنداۋ ءۇشىن ارەكەت ەتىپ جاتىر.
وسى مالىمدەمەگە سايكەس، مەملەكەتتىك دەپارتامەنت ۆيزالىق شەكتەۋلەردىڭ جاڭا ساياساتىن جاريالايدى. «بۇل ساياسات ءبىزدىڭ ايماقتاعى جەمقورلىق نەمەسە ناشاقورلىق ارقىلى دەموكراتيالىق جولمەن سايلانعان ۇكىمەتتى السىرەتەتىن شەتەلدىك ازاماتتار مەن ولاردىڭ وتباسى مۇشەلەرىنە ۆيزا بەرۋدى شەكتەيدى. دەموكراتيالىق جولمەن سايلانعان ۇكىمەتتى السىرەتۋ امەريكا ەلدەرىندەگى قاۋىپسىزدىك پەن زاڭ ۇستەمدىگىنە قاتەر توندىرەدى. بۇل — دالەلدەر پايدا بولعان سايىن امەريكا قۇراما شتاتتارىنا سەرىكتەستەرىمىزبەن ۇيلەسىمدە جىلدام ارەكەت ەتۋگە مۇمكىندىك بەرەتىن سەنىمدى تەتىك. مەملەكەتتىك دەپارتامەنت وسى ساياسات اياسىندا «امەريكا قالقانى» باعدارلاماسىنىڭ باسقا قاتىسۋشىلارى — بوليۆيا، كولۋمبيا، ەكۆادور جانە پەرۋدى قولداۋ ءۇشىن ۆيزالىق شەكتەۋلەر ەنگىزۋ بويىنشا دەرەۋ شارالار قابىلداپ جاتىر»، — دەلىنگەن ۆەدومستۆو مالىمدەمەسىندە.
وسى ساياسات اياسىندا ترامپ اكىمشىلىگى بوليۆيانىڭ 12 ازاماتى مەن ولاردىڭ وتباسى مۇشەلەرىنە، كولۋمبيانىڭ ەكى ازاماتى مەن ولاردىڭ وتباسى مۇشەلەرىنە، پەرۋدىڭ ءبىر ازاماتى مەن ونىڭ وتباسىنا ۆيزالىق شەكتەۋلەر ەنگىزۋ بويىنشا قادامدار جاسادى.
سونىمەن قاتار، مەملەكەتتىك دەپارتامەنت بوليۆيانىڭ باس پروكۋرورى رودجەر مارياكانى جەمقورلىققا قاتىسى بار دەپ كىنالى دەپ جاريالادى. بۇل ارەكەت مارياكا مەن ونىڭ جاقىن وتباسى مۇشەلەرىن امەريكا قۇراما شتاتتارىنا كىرۋگە جارامسىز ەتەدى، دەپ مالىمدەدى اقش مەملەكەتتىك دەپارتامەنتى.