قازاقستاندا ماڭعىستاۋ وبلىسىندا اسكەري قىزمەتشىلەردىڭ قازا تابۋ ءمان-جايىن تەرگەۋ ءۇشىن ۇكىمەتتىك كوميسسيا قۇرىلدى. پرەمەر-مينيستر ولجاس بەكتەنوۆ كوميسسيا ءتوراعاسى قانات بوزىمباەۆقا توتەنشە جاعداي بولعان جەرگە دەرەۋ بارۋدى تاپسىردى، دەپ حابارلايدى infohub.kz سايتى.
كوميسسيا قۇرامىنا قورعانىس ءمينيسترى، ماڭعىستاۋ وبلىسىنىڭ اكىمى، ەڭبەك جانە حالىقتى الەۋمەتتىك قورعاۋ، توتەنشە جاعدايلار، دەنساۋلىق ساقتاۋ، كولىك مينيسترلىكتەرىنىڭ باسشىلارى، باس اسكەري پروكۋرور، سونداي-اق شەكارا قىزمەتىنىڭ وكىلدەرى كىردى.
«پرەمەر-مينيستر كوميسسيا ءتوراعاسى قانات بوزىمباەۆقا اسكەري قىزمەتشىلەردىڭ قازا تابۋ سەبەپتەرىن جان-جاقتى تەرگەۋدى قامتاماسىز ەتۋ جانە قازا تاپقانداردىڭ وتباسىلارىنا كومەك كورسەتۋ جۇمىستارىن باستاۋدى تاپسىردى»، — دەدى مينيسترلەر كابينەتىندە.
قايعىلى وقيعا بۇگىن، 24 قىركۇيەكتە كاسپي تەڭىزىنىڭ جاعالاۋىندا اسكەري-تەڭىز كۇشتەرىنىڭ وقۋ-جاتتىعۋى كەزىندە بولدى. اۋا رايىنىڭ كۇرت ناشارلاۋى مەن داۋىلدى جەلدىڭ سالدارىنان تەڭىزگە 19 اسكەري قىزمەتشى اعىپ كەتتى. قورعانىس مينيسترلىگىنىڭ دەرەگىنشە، توعىز ادام قازا تاپتى، ۇشەۋىن قۇتقارۋ مۇمكىن بولدى، قالعاندارىن ىزدەۋ اۆياسيا، اسكەري-تەڭىز كۇشتەرى جانە توتەنشە جاعدايلار مينيسترلىگىنىڭ كۇشتەرىن تارتا وتىرىپ جالعاسۋدا.
وقيعا ورنىنا قورعانىس ءمينيسترى داۋرەن قوسانوۆ باستاعان كوميسسيا اتتاندى. قورعانىس مينيسترلىگىندە قازا تاپقانداردىڭ تۋىستارىنا كوڭىل ايتىپ، ولاردىڭ وتباسىلارىنا قاجەتتى كومەكتىڭ بارلىعىن كورسەتۋگە ۋادە بەردى.
بۇعان دەيىن «كۋرسيۆ» اقتاۋ گارنيزونىنداعى وقۋ-جاتتىعۋ كەزىندە توعىز اسكەري قىزمەتشى قازا تاپقاننان كەيىن باس پروكۋراتۋرا تەرگەۋ باستاعانىن جازعان بولاتىن.