اقتاۋدا ءبىر جارىم جاسار بالانى قاعىپ ولتىرگەن بۇرىنعى پوليسيا قىزمەتكەرىنە سوت ۇكىم شىعاردى: ول 1 جىل 6 ايعا باس بوستاندىعىنان ايىرىلدى، دەپ حابارلايدى infohub.kz سايتى.
ماڭعىستاۋ وبلىستىق سوتىنىڭ مالىمەتىنشە، اقتاۋ قالالىق سوتىنىڭ ۇكىمىمەن سوتتالۋشى قازاقستان رەسپۋبليكاسى قىلمىستىق كودەكسىنىڭ 345-بابىنىڭ 3-بولىگىندە كوزدەلگەن قۇقىق بۇزۋشىلىقتى جاساعانى ءۇشىن كىنالى دەپ تانىلدى. بۇل باپ كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋىن قاراستىرادى.
باس بوستاندىعىنان ايىرۋمەن قاتار، سوتتالعان ادام 5 جىلعا كولىك قۇرالىن باسقارۋ قۇقىعىنان ايىرىلدى.
زياندى وتەۋ ماسەلەسى سوتتان تىس تارتىپپەن شەشىلدى. ۇكىم زاڭدى كۇشىنە ەندى.
ەسكە سالايىق، وسى جىلدىڭ مامىر ايىندا اقتاۋداعى ءبىر اۋلادا ءبىر جارىم جاسار بالا قاعىلىپ ولتىرىلگەن بولاتىن. قىزمەتتىك كولىكتىڭ رولىندە پوليسەي وتىرعان، ول ۋاقىتشا ۇستاۋ يزولياتورىنا قامالدى.
انىقتالعانداي، ءسابي الاڭدا اكەسىمەن ويناپ جۇرگەن. ءبىر ساتتە ەر ادام الاڭداپ كەتكەندە، بالا ءجۇرىس بولىگىنە جۇگىرىپ شىققان. سول كەزدە جۇرگىزۋشى كەيىن شەگىنىپ بارا جاتىپ، بالانى بايقاماي قالعان — سوقتىعىسۋ سالدارىنان ءسابي جول-كولىك وقيعاسى ورنىندا كوز جۇمدى.