الەۋمەتتىك جەلىلەردە اقتاۋداعى نازاربايەۆ زياتكەرلىك مەكتەبىنىڭ قىزمەتكەرى ماس كۇيدە جۇرگەنىن كورسەتەتىن بەينەجازبا تارادى. وقۋ ورنىندا تەكسەرۋ باستالدى، دەپ حابارلايدى infohub.kz سايتى.
Lada.kz باسىلىمىنىڭ دەرەگىنشە، جەلىدە جاريالانعان ۆيدەودا نزي وقۋشىلارى مۇعالىمنەن وقۋ ورنىنا نەگە ماس كۇيدە كەلگەنىن سۇرايدى. ەر ادام «سولاي بولىپ قالدى» دەپ جاۋاپ بەرىپ، قىلىعى ءۇشىن كەشىرىم سۇرايدى.
جاريالانىم اۆتورلارىنىڭ ايتۋىنشا، مۇنداي جاعداي بۇعان دەيىن دە بولعان كورىنەدى. سول وقيعالاردىڭ بىرىندە ءمۇعالىم بالالارمەن دورەكى سويلەسىپ، جانجالعا يتەرمەلەۋى مۇمكىن. الايدا بۇل تۇجىرىمدار ازىرگە رەسمي راستالماعان.
وقيعاعا اقتاۋداعى نزي باسشىلىعى پىكىر ءبىلدىردى.
«مەكتەپتە ىشكى تەرگەۋ جۇرگىزىلۋدە. ايتىلعان فاكتىلەر تەكسەرىلۋدە. تەكسەرۋ اياقتالعان سوڭ، ەگەر قىزمەتكەر تاراپىنان بۇزۋشىلىقتار راستالسا، ەڭبەك كودەكسىنە سايكەس شارالار قولدانىلادى. ولار جۇمىستان شىعارۋعا دەيىن جەتۋى مۇمكىن»، — دەدى اقتاۋداعى نزي ديرەكتورى رينات جۇمابايەۆ.
جاعداي ماڭعىستاۋ وبلىسىنىڭ ءبىلىم بەرۋ جۇيەسىندە دە باقىلاۋعا الىندى. وقۋ-اعارتۋ مينيسترلىگىنىڭ حابارلاۋىنشا، جاريالانىم شىققان سوڭ وبلىستىق ءبىلىم ساپاسىن قامتاماسىز ەتۋ دەپارتامەنتى ءمان-جايدى انىقتاۋ ءۇشىن نزي-گە جۇگىنگەن.
ۆەدومستۆو نازاربايەۆ زياتكەرلىك مەكتەپتەرى اۆتونوميالىق ءبىلىم بەرۋ ۇيىمى ەكەنىن جانە وقۋ پروسەسىن ۇيىمداستىرۋ مەن ىشكى باقىلاۋعا وزدەرى جاۋاپتى ەكەنىن اتاپ ءوتتى.
ەگەر وقيعا تۋرالى اقپارات راستالسا، تەك قىزمەتكەردىڭ ارەكەتىنە عانا ەمەس، ىشكى باقىلاۋ جۇمىسىنا، سونداي-اق وقۋشىلاردىڭ قاۋىپسىزدىگىنە جاۋاپتى لاۋازىمدى تۇلعالاردىڭ ارەكەتىنە دە باعا بەرىلمەك.
ازىرگە تەكسەرۋ جالعاسۋدا. وقيعا بويىنشا تۇپكىلىكتى قورىتىندى تەكسەرۋ اياقتالعان سوڭ جاسالادى.