اقتوبە قالاسىنداعى الماتى اۋدانىنىڭ اكىمى بولىپ مۇقانبەتقالي ەسەنعالييەۆ تاعايىندالدى. بۇعان دەيىن ول اقتوبە وبلىسى اكىمى اپپاراتى باسشىسىنىڭ ورىنباسارى قىزمەتىن اتقارعان، دەپ حابارلايدى infohub.kz سايتى.
الماتى اۋدانى اكىمدىگىنىڭ Instagram-داعى رەسمي پاراقشاسىندا جازىلعانداي، جاڭا اكىمدى قالالىق ءماسليحات دەپۋتاتتارى مەن ۇجىمعا اقتوبە باسشىسى ازامات بەكەت تانىستىردى.
مۇقانبەتقالي ەسەنعالييەۆ 1987 جىلى دۇنيەگە كەلگەن. ول ەكى جوعارى بىلىمگە يە. جۇبانوۆ اتىنداعى اقتوبە مەملەكەتتىك ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىعى بويىنشا، سونداي-اق قازاق-ورىس حالىقارالىق ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن.
ەڭبەك جولىن اقتوبە قالاسىنىڭ ەكونوميكا جانە قارجى بولىمىندە باس مامان جانە سەكتور مەڭگەرۋشىسى، اقتوبە قالاسىنىڭ كاسىپكەرلىك بولىمىندە سەكتور مەڭگەرۋشىسى، اقتوبە وبلىسى اكىمى اپپاراتىندا باس مامان جانە باس ينسپەكتور قىزمەتتەرىندە باستاعان. ءار جىلدارى حرومتاۋ اۋدانى اكىمى اپپاراتىنىڭ باسشىسى، اقتوبە وبلىسى اكىمى اپپاراتىنىڭ ۇيىمداستىرۋ-باقىلاۋ جۇمىسى ءبولىمىنىڭ باسشىسى، اقتوبە وبلىسى اكىمى اپپاراتى باسشىسىنىڭ ورىنباسارى لاۋازىمدارىن اتقارعان.
كەزدەسۋ بارىسىندا الماتى اۋدانىنىڭ جاڭا اكىمى مۇقانبەتقالي ەسەنعالييەۆ وزىنە كورسەتىلگەن سەنىمدى اقتاۋ جانە جۇكتەلگەن مىندەتتەردى ساپالى ورىنداۋ ءۇشىن بار كۇشىن سالاتىنىن ايتتى.