اقتوبە وبلىسى شالقار اۋدانى بەگىمبەت اۋىلىنداعى بالاباقشادا تاربيەشىنىڭ كومەكشىسى ۇيىقتاپ جاتقان ءبىر جارىم جاسار بالانىڭ بەتىن تىرناپ كەتتى. وقيعانى بەينەباقىلاۋ كامەرالارى ءتۇسىرىپ العان، دەپ حابارلايدى infohub.kz سايتى.
جازبادا بالاباقشا قىزمەتكەرىنىڭ ۇيىقتاپ جاتقان ءبىر جارىم جاسار سابيگە جاقىنداپ، بەتىن تىرناپ، بولمەدەن شىعىپ كەتكەنى كورىنەدى. سوڭعى 17 جىل بويى مەكتەپكە دەيىنگى مەكەمەدە جۇمىس ىستەپ جۇرگەن ەرەسەك ادامدى نە يتەرمەلەگەنىن ءقازىر پوليسەيلەر انىقتاپ جاتىر.
كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ نەمەسە تيىسىنشە ورىنداماۋ فاكتىسى بويىنشا قىلمىستىق ءىس قوزعالعانى بەلگىلى. تەرگەۋ ارەكەتتەرى جۇرگىزىلىپ، بەينەباقىلاۋ كامەرالارىنىڭ جازبالارى الىندى.
اۋداندىق ءبىلىم ءبولىمىنىڭ مالىمەتىنشە، بالاباقشادا 25 بالا تاربيەلەنەدى.
«وقيعادان كەيىن ارنايى كوميسسيا قۇرىلىپ، تەكسەرۋ جۇرگىزىلۋدە، سوت-مەديسينالىق ساراپتاما تاعايىندالدى. وقيعاعا قاتىسى بار قىزمەتكەر وسى مەكەمەدە 2009 جىلدان بەرى جۇمىس ىستەيدى. قازىرگى تاڭدا ول مىندەتتەرىن ورىنداۋدان شەتتەتىلدى. ءبىلىم مەكەمەسىندە بولعان وقيعاعا بايلانىستى وكىنىش بىلدىرەمىز. جاعداي باقىلاۋدا»، — دەدى شالقار اۋدانىنىڭ ءبىلىم ءبولىمىنىڭ باسشىسى ايان باشانوۆ.