اقتوبەدە «زاماناۋي حيرۋرگيانىڭ وزەكتى ماسەلەلەرى» اتتى حالىقارالىق قاتىسۋمەن رەسپۋبليكالىق عىلىمي-پراكتيكالىق كونفەرەنسيا ءوتتى. وعان قازاقستاننىڭ جەتەكشى حيرۋرگتەرى، عالىمدارى مەن مەديسينا قاۋىمداستىعىنىڭ وكىلدەرى، سونداي-اق بەلارۋس، تۇركيا، وڭتۇستىك كورەيا، وزبەكستان جانە قىرعىزستاننان كەلگەن ماماندار قاتىستى، دەپ حابارلايدى infohub.kz سايتى.
كونفەرەنسياعا قاتىسۋشىلاردى قۇتتىقتاعان اقتوبە وبلىسىنىڭ اكىمى اسحات شاحاروۆ حيرۋرگيانى دامىتۋ تەك زاماناۋي تەحنولوگيالار مەن جابدىقتاردى عانا ەمەس، سونىمەن قاتار بىلىكتى مامانداردى دايارلاۋدى تالاپ ەتەتىنىن اتاپ ءوتتى.
«بۇل كونفەرەنسيا – تاجىريبە الماسۋدىڭ الاڭى عانا ەمەس، حيرۋرگيانىڭ قازىرگى جاعدايى مەن ونى ودان ءارى دامىتۋ باعىتتارى تۋرالى ماڭىزدى كاسىبي ديالوگ. مەملەكەت باسشىسى قاسىم-جومارت توقاەۆتىڭ تاپسىرماسىمەن دەنساۋلىق ساقتاۋ جۇيەسىن دامىتۋعا ەرەكشە كوڭىل بولىنۋدە. سوڭعى 3 جىلدا اقتوبە وبلىسىندا سالاعا 20،3 ملرد تەڭگە باعىتتالىپ، 40 مەديسينالىق نىسان سالىندى، تاعى 40 عيماراتقا كۇردەلى جوندەۋ جۇرگىزىلدى. ءوڭىر ءۇشىن حيرۋرگيالىق قىزمەتتى دامىتۋ، زاماناۋي تەحنولوگيالاردى ەنگىزۋ، مامانداردىڭ بىلىكتىلىگىن ارتتىرۋ جانە مەديسينالىق كومەك ساپاسىن قامتاماسىز ەتۋ ەرەكشە ماڭىزعا يە. وبلىس ستاسيونارلارىندا جىل سايىن شامامەن 50 مىڭ پاسيەنتكە حيرۋرگيالىق كومەك كورسەتىلىپ، 12 مىڭنان استام وتا جاسالادى. مەديسينالىق كادرلاردى دايارلاۋ مەن عىلىمدى دامىتۋدا مارات وسپانوۆ اتىنداعى باتىس قازاقستان مەديسينا ۋنيۆەرسيتەتىنىڭ ءرولى زور، ال حالىقارالىق ىنتىماقتاستىق دارىگەرلەرىمىزگە وزىق شەتەلدىك تاجىريبەنى مەڭگەرۋگە مۇمكىندىك بەرەدى. بۇگىن اقتوبەدە جينالعان قازاقستاننىڭ جەتەكشى حيرۋرگتەرى مەن شەتەلدىك مامانداردىڭ كاسىبي تاجىريبەسى ءوڭىردىڭ حيرۋرگيالىق قىزمەتىن ودان ءارى دامىتۋعا جاڭا سەرپىن بەرەتىنىنە سەنىمدىمىن»، – دەدى اسحات شاحاروۆ.
كونفەرەنسيا اياسىندا مەديسينا مەن حيرۋرگيانى دامىتۋعا ەلەۋلى ۇلەس قوسقان مامانداردى ماراپاتتاۋ ءراسىمى ءوتتى. «اقتوبە وبلىسىن دامىتۋعا قوسقان ۇلەسى ءۇشىن» توسبەلگىسىمەن باشكەنت ۋنيۆەرسيتەتىنىڭ پروفەسسورى مەحمەت حابەرال (تۇركيا)، اكادەميكتەر ءارى پروفەسسورلار جاقسىلىق دوسكالييەۆ پەن بولاتبەك بايماحانوۆ، پروفەسسور ساليم بەركىمبايەۆ، سونداي-اق مەديسينا عىلىمدارىنىڭ دوكتورى، پروفەسسور قايرات سابىر ماراپاتتالدى.
اقتوبە وبلىسى اكىمىنىڭ قۇرمەت گراموتالارىمەن قازاقستان مەن شەتەلدەن كەلگەن تاعى 10 مامان ماراپاتتالدى. ولاردىڭ قاتارىندا وزبەكستان، قىرعىزستان، بەلارۋس، استانا، الماتى، سەمەي، قىزىلوردا جانە تارازدان كەلگەن تانىمال حيرۋرگتەر مەن عالىمدار بار. ماراپاتتار حيرۋرگيالىق قىزمەتتى، مەديسينا عىلىمىن، حالىقارالىق ىنتىماقتاستىقتى جانە عىلىمي-پراكتيكالىق بايلانىستاردى دامىتۋعا قوسقان ۇلەسى ءۇشىن بەرىلدى.
كونفەرەنسيانىڭ نەگىزگى باعدارلاماسى پلەنارلىق وتىرىستارمەن جالعاستى. ءبىر الاڭدا مەديسينانىڭ ءتۇرلى سالالارىنىڭ ماماندارى: حيرۋرگيا، ترانسپلانتولوگيا، ونكولوگيا، تامىر جانە كارديوحيرۋرگيا وكىلدەرى جينالدى. ولار كاسىبي تاجىريبە الماسىپ، زاماناۋي جەتىستىكتەر مەن عىلىمي ازىرلەمەلەردى تانىستىردى، سونداي-اق حيرۋرگيالىق قىزمەتتى دامىتۋ جانە مەديسينالىق پراكتيكاعا جاڭا تاسىلدەردى ەنگىزۋ پەرسپەكتيۆالارىن تالقىلادى.
ءىس-شاراعا ونلاين فورماتتا سەۋل ۇلتتىق ۋنيۆەرسيتەتىنىڭ پروفەسسورى كۆانگ ۆۋنگ لي دە ءسوز سويلەدى. ول بۇعان دەيىن قازاقستاندىق ماماندارمەن ترانسپلانتولوگيا سالاسىندا جۇمىس ىستەگەن. ءوز سوزىندە ول دارىگەرلەر اراسىنداعى حالىقارالىق ءوزارا ءىس-قيمىل مەن تاجىريبە الماسۋدىڭ ماڭىزدىلىعىن اتاپ ءوتتى.
كونفەرەنسيا قورىتىندىسى بويىنشا قاتىسۋشىلار حيرۋرگيالىق كومەكتى جەتىلدىرۋ، كاسىبي قۇزىرەتتەردى دامىتۋ جانە زاماناۋي مەديسينالىق تەحنولوگيالاردى ەنگىزۋگە بايلانىستى ودان ءارى جۇمىس باعىتتارىن بەلگىلەدى. مۇنداي كەزدەسۋلەر كاسىبي بايلانىستاردى نىعايتۋعا جانە ءوڭىردىڭ حيرۋرگيالىق قىزمەتىن ودان ءارى دامىتۋعا ىقپال ەتەدى.