قازاقستاندىق سپورتشى ارايلىم شەگەنوۆا جاپونيانىڭ ايچي مەن ناگويا قالالارىندا ءوتىپ جاتقان 2026 جىلعى XX جازعى ازيا ويىندارىنىڭ قولا جۇلدەگەرى اتاندى. بۇل جۇلدە تاريحتا قالدى: بۇعان دەيىن قازاقستاننىڭ ايەلدەر كۋراش قۇراماسى ازيادا تۇعىرىنا ەشقاشان كوتەرىلمەگەن، دەپ حابارلايدى infohub.kz سايتى.
29 جاستاعى شەگەنوۆا 87 كەلىدەن جوعارى سالماق دارەجەسىندە سىنعا ءتۇستى. جارتىلاي فينالدا ول وڭتۇستىك كورەيا وكىلى كيم مين ەنمەن كەزدەسىپ، 1:0 ەسەبىمەن جەڭىلىس تاپتى. جارىس ەرەجەسىندە ءۇشىنشى ورىن ءۇشىن جەكە بەلدەسۋ قاراستىرىلماعاندىقتان، قازاقستاندىق سپورتشى قولا مەدالدى اۆتوماتتى تۇردە يەلەندى.
شەگەنوۆا تۇعىرعا ەكى سەنىمدى جەڭىسپەن قادام باستى. 1/8 فينالدا ول ۆەتنام سپورتشىسى دىونگ تحان تحاندى 5:0 ەسەبىمەن تىزە بۇكتىرسە، شيرەك فينالدا وڭتۇستىككورەيالىق پاك چونۆوننان 3:0 ەسەبىمەن باسىم ءتۇستى.
قازاقستان قۇراماسى ءۇشىن بۇل ازيادا-2026 كۋراشتان ەكىنشى جۇلدە. ءبىر كۇن بۇرىن ادىلەت احمەتگالي 81 كەلىگە دەيىنگى سالماق دارەجەسىندە قولا مەدال جەڭىپ العان بولاتىن.
كۋراش — بەلدەۋدە عانا كۇرەس جۇرگىزىلەتىن ءداستۇرلى بەلبەۋ كۇرەسى. سپورتشى قۇلاعان سوڭ، پارتەردە كۇرەس جالعاسپايدى.
جاپونياداعى XX جازعى ازيا ويىندارى 19 قىركۇيەكتە رەسمي تۇردە اشىلدى. جارىسقا 45 ەلدىڭ سپورتشىلارى قاتىسىپ، 460 مەدال جيىنتىعى ساراپقا سالىنۋدا. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى ونەر كورسەتۋدە.