ماسكەۋدە ۋكراينا پرەزيدەنتى كەڭسەسىنىڭ بۇرىنعى كەڭەسشىسى الەكسەي ارەستوۆيچكە سىرتتاي ۇكىم شىعارىلدى: ول تەرروريزمگە شاقىرعانى جانە رەسەي قارۋلى كۇشتەرى تۋرالى جالعان اقپارات تاراتقانى ءۇشىن كىنالى دەپ تانىلىپ، 11 جىلعا باس بوستاندىعىنان ايىرىلدى، دەپ حابارلايدى infohub.kz سايتى.
ريا ءنوۆوستيدىڭ ەكىنشى باتىس وكرۋگتىك اسكەري سوتىنىڭ زالىنان حابارلاۋىنشا، سۋديا شەشىمدى جاريالادى: «قىلمىستاردىڭ جيىنتىعى بويىنشا ارەستوۆيچ الەكسەي نيكولاەۆيچكە تۇپكىلىكتى جازا رەتىندە 11 جىل باس بوستاندىعىنان ايىرۋ تاعايىندالسىن». العاشقى ءۇش جىلدى تۇرمەدە وتكىزەدى، قالعان مەرزىمىن جالپى رەجيمدەگى كولونيادا وتەيدى. سونىمەن قاتار، سوت وعان ءتورت جىل بويى ينتەرنەتتەگى سايتتار مەن ارنالاردى باسقارۋعا تىيىم سالدى.
ارەستوۆيچ رەسەيدە ىزدەۋ جاريالانعان. تەرگەۋ انىقتاعانداي، 2022 جىلدىڭ 17 ناۋرىزىندا ول الەۋمەتتىك جەلىلەر مەن بەينەحوستينگتەردە رەسەيلىك اسكەرلەردى جابدىقتاۋ جۇرگىزىلەتىن تەمىر جولداردى جويۋعا شاقىرعان بەينەۇندەۋ جاريالاعان. سول جىلدىڭ 8 ساۋىرىندە ول كراماتورسكىدەگى تەمىرجول ۆوكزالىن رەسەي قارۋلى كۇشتەرىنىڭ اسكەري قىزمەتكەرلەرى اتقىلاعانى تۋرالى جالعان مالىمەتتەردى جەلىدە جاريالاپ، كەمىندە 33 ادام قازا تاۋىپ، 100-گە جۋىق بەيبىت تۇرعىن جارالانعانىن مالىمدەگەن.
ارەستوۆيچتىڭ ارەكەتتەرى رەسەي قك-نىڭ 205.2-بابىنىڭ 2-بولىگى (ينتەرنەتتى پايدالانا وتىرىپ، تەرروريستىك قىزمەتكە جاريا شاقىرۋ) جانە 207.3-بابىنىڭ 2-بولىگىنىڭ «د» تارماعى (ۇلتتىق الاۋىزدىق سەبەپتەرى بويىنشا رەسەي قارۋلى كۇشتەرى تۋرالى ادەيى جالعان اقپارات تاراتۋ) بويىنشا سارالانعان.
ەسكە سالايىق، ارەستوۆيچ ۋكراينا پرەزيدەنتى كەڭسەسىنىڭ كەڭەسشىسى قىزمەتىن اتقارعان جانە دنەپردەگى زىمىران وقيعاسىنا بايلانىستى جانجالدان كەيىن 2023 جىلدىڭ باسىندا ونى تاستاپ كەتكەن. ول الەۋمەتتىك جەلىدە ءوتىنىش فوتوسىن جاريالاپ، جىبەرگەن پرينسيپتىك قاتەلىگىنە بايلانىستى وتستاۆكاعا كەتكەنىن حابارلاعان. 2023 جىلدىڭ كۇزىندە ۋكراينادا وعان قاتىستى قىلمىستىق ءىس قوزعالعان، ال 2025 جىلى پرەزيدەنت ۆلاديمير زەلەنسكي وعان قارسى سانكسيالار ەنگىزگەن.