اريزوناداعى گراند-كانون ۇلتتىق ساياباعىندا سەنبى كۇنى تۇستەن كەيىن بولعان قاتتى تاسقىن سالدارىنان كەمىندە 15 ادام حابارسىز كەتكەن نەمەسە تابىلماعان بولۋى مۇمكىن. بۇل تۋرالى ۇلتتىق ساياباق قىزمەتى حابارلادى.
تاسقىن برايت-ەيندجەل شاتقالى مەن فانتوم-رانچ ايماعىندا بولدى. ساياباق قىزمەتكەرلەرى مەن اريزونا شتاتىنىڭ قوعامدىق قاۋىپسىزدىك دەپارتامەنتى جەكسەنبى تاڭعى جاعداي بويىنشا 60-تان استام ادامدى ەۆاكۋاسيالادى. ۇلتتىق ساياباق قىزمەتىنىڭ مالىمدەمەسىنە سايكەس، جەكسەنبىگە دەيىن زارداپ شەككەندەر تۋرالى اقپارات جوق.
«فانتوم-رانچ، برايت-ەيندجەل كەمپينگى، فانتوم-رانچ اسحاناسى مەن كوتتەدجدەرى، سونداي-اق نورت-كايباب سويىلىنىڭ باسىنان فانتوم-رانچقا دەيىنگى بۇكىل نورت-كايباب جولى كەلەسى حابارلاماعا دەيىن جابىق»، — دەلىنگەن مالىمدەمەدە.
ساياباق اكىمشىلىگى بولەك مالىمدەمەدە حابارسىز كەتكەن نەمەسە تابىلماعان ادامداردىڭ سانىن جاريالاپ، جۇرتشىلىقتان سەنبى كۇنى برايت-ەيندجەل بۇلاعىنىڭ بويىنداعى ىشكى شاتقالدا بولعان «جاياۋ جۇرگىنشىلەر نەمەسە ريۋكزاكپەن جۇرەتىندەر» تۋرالى، سونداي-اق «زارداپ شەككەن ايماقتا كەمپينگكە برونداعاندار» تۋرالى كەز كەلگەن اقپاراتتى حابارلاۋدى سۇرادى.
برايت-ەيندجەل بۇلاعىنىڭ ۇستىندەگى بارلىق دەرلىك جاياۋ جۇرگىنشىلەر كوپىرى قيراعان، ال كولورادو وزەنىنە مەتالل قۇرىلىمدار مەن قوقىستار ءتۇسىپ جاتقاندىقتان، وزەندەگى قوزعالىس كەلەسى حابارلاماعا دەيىن جابىق، دەپ حابارلادى شەنەۋنىكتەر.
فلاگستاففتاعى ۇلتتىق اۋا رايى قىزمەتىنىڭ مەتەورولوگى دجاستين دجوندروۋدىڭ Associated Press اگەنتتىگىنە ايتۋىنشا، تىك جارتاستى ايماقتا شامامەن 30 مينۋت ىشىندە 1-2،5 سانتيمەتر جاۋىن-شاشىن تۇسكەن. «ونىڭ كوپ بولىگى بىردەن اعىپ كەتتى»، — دەدى دجوندروۋ.
ونىڭ ايتۋىنشا، تاسقىن گراند-كانوننىڭ سولتۇستىك بولىگىندە بولعان، وندا برايت-ەيندجەل بۇلاعى سولتۇستىك جيەكتەن كولورادو وزەنىنە قاراي شامامەن 1800 مەترگە تومەندەيدى. ايماقتا دۇيسەنبىگە دەيىن تاعى جاڭبىر مەن نايزاعاي بولۋى مۇمكىن.