استانالىق ازامات فۋتبول ماچىنان كەيىن ارنايى جاساق قىزمەتكەرلەرىن قاتتى ۇرىپ-سوقتى دەپ ايىپتادى. وسىعان بايلانىستى ەلوردا پوليسياسى قىزمەتتىك تەكسەرۋ باستادى، دەپ حابارلايدى infohub.kz.
ەر ادام ءوز وقيعاسىن Threads الەۋمەتتىك جەلىسىندە جاريالادى. وقيعا 12 شىلدەدە «استانا ارەنا» ستاديونى ماڭىندا پرەمەر-ليگانىڭ «استانا» مەن «اقتوبە» كوماندالارى اراسىنداعى ماچتان كەيىن بولعان. ونىڭ ايتۋىنشا، ونى جانە اعاسىن ارنايى جاساقتىڭ توعىز قىزمەتكەرى ۇرىپ-سوققان. ولار قول-اياقپەن، بەرس كيگەن اياقپەن باستان ۇرعان. بۇل كورىنىس زارداپ شەككەن ادامنىڭ قارىنداستارىنىڭ كوز الدىندا بولعان. سودان كەيىن ەر ادامداردى كولىككە يتەرىپ، جارتى ساعات ۇستاپ، شابۋىلداۋشىلاردىڭ بەت-الپەتى تۇسىرىلگەن بەينەجازبانى جويۋعا ماجبۇرلەگەن.
«ءبىزدى قول-اياقپەن، بەرس كيگەن اياقپەن باستان اياۋسىز ءارى ۇزدىكسىز ۇردى. كەيىن كولىكتە جارتى ساعات ۇستاپ، ولاردىڭ بەتتەرى كورىنگەن ۆيدەونى كۇشپەن جويعىزدى»، — دەپ جازدى ول.
زارداپ شەككەن ادام اۋرۋحاناعا جۇگىندى، وندا دارىگەرلەر اۋىر سوققىلاردى، جابىق باس-مي جاراقاتىن جانە مي شايقالۋىن تىركەدى. «دارىگەرلەر اۋىر سوققىلاردى تىركەپ، وعان قوسا جابىق باس-مي جاراقاتى مەن مي شايقالۋى تۋرالى قورىتىندى بەردى. كەيىن پوليسيا دەپارتامەنتىنىڭ قاۋىپسىزدىك قىزمەتىنىڭ قىزمەتكەرى قىلمىستىق ءىس قوزعاۋدان باس تارتقان سوڭ، ءبىز ءوز ەركىمىزبەن اقىلى نەگىزدە سوت-مەديسينالىق ساراپتاما جاساتتىق»، — دەلىنگەن جاريالانىمدا. ەر ادام كۋاگەرلەردى حابارلاسۋعا شاقىردى.
استانا پوليسياسى ماچ كەزىندە جانكۇيەرلەر توبىنىڭ اگرەسسيۆتى ارەكەت ەتكەنىن راستادى: ولار بىلاپىت سويلەپ، قارسى كوماندانىڭ جانكۇيەرلەرىن ارانداتىپ، ادەپسىز ىم-يشارا كورسەتكەن. قاتىسۋشىلاردىڭ ءبىرى اياعىنا قارسى كوماندانىڭ فۋتبول كلۋبىنىڭ جالاۋىن بايلاعان. پوليسيا قىزمەتكەرلەرى جانجالدىڭ الدىن الۋ ءۇشىن ارالاسقان. وقيعاعا قاتىسۋشىلاردى وقشاۋلاپ، قىزمەتتىك اۆتوبۋسقا اپارىپ، كەيىن بوساتقان.
«سونىمەن بىرگە وسى فاكتى بويىنشا قىزمەتتىك تەكسەرۋ تاعايىندالدى. ونىڭ ناتيجەلەرى بويىنشا وقيعاعا قاتىسۋشىلاردىڭ بارلىق ارەكەتىنە قولدانىستاعى زاڭناماعا سايكەس قۇقىقتىق باعا بەرىلەدى»، — دەپ قوستى ۆەدومستۆو.