inDrive سەرۆيسىنىڭ نەگىزىن قالاۋشى جانە باس اتقارۋشى ديرەكتورى ارسەن تومسكي الماتىعا كەلىپ، كيىمىن جاڭارتۋدى ۇيعاردى. وعان ەڭ جاقىن ورنالاسقان Esentai Mall ساۋدا ورتالىعىنداعى كيىم باعالارى بايلىعى 865 ميلليون دوللارعا باعالانعان كاسىپكەردى تاڭ قالدىردى، دەپ حابارلايدى infohub.kz سايتى.
اسەرلەرى تۋرالى بيزنەسمەن Threads الەۋمەتتىك جەلىسىندە جازدى. ونىڭ ايتۋىنشا، ول الماتىدا ماۋسىم ايىنىڭ باسىنان بەرى بولماعان. قالاعا ورالعان سوڭ كاسىپكەر كيىمىنىڭ از ەكەنىن بايقاپ، ەڭ جاقىن ساۋدا ورتالىعىنا بارعان.
«مەن، جۇمساق تىلمەن ايتقاندا، ەڭ كەدەي ادام ەمەسپىن، ءبىراق مىنا فۋتبولكالاردى 1 000 دوللارعا كىم ساتىپ الادى؟ ەڭ باستىسى، نە ءۇشىن؟» — دەپ جازدى تومسكي.
جازبا شامامەن 103 مىڭ قارالىم جيناپ، قىزۋ تالقىلاۋ تۋدىردى. پايدالانۋشىلار قازاقستانداعى كيىم باعالارىن تالقىلاپ، ءوز تاجىريبەلەرىمەن بولىسە باستادى.
پىكىر قالدىرۋشىلاردىڭ ءبىرى كوكتەمدە استانادا New Balance كروسسوۆكاسى 129 مىڭ تەڭگە تۇرعانىن، ال قىتايدا ءدال سونداي جۇپتى 36 مىڭ تەڭگەگە ساتىپ العانىن ايتتى. ونىڭ سوزىنشە، قازاقستاندا 96 مىڭ تەڭگە تۇرعان Nike دجينسىسىن Nike Factory Store دۇكەنىنەن 19 مىڭ تەڭگەگە الۋعا بولادى.
«جالپى قازاقستاندا زات ساتىپ الۋعا قۇلقىڭ بولمايدى»، «ەر جەتكەندە ارسەن سياقتى بولامىن — باي، ءبىراق اقشانىڭ ءقادىرىن بىلەتىن»، «شەتەلدە برەندتەر «ەسەنتايعا» قاراعاندا الدەقايدا ارزان. سوندا ساتىپ العان دۇرىس. قورشاعان ورتاعا كوزگە ءتۇسۋ ءۇشىن بولسا، وسىندا دۇرىس. تەك پافوس ءۇشىن»، — دەپ جازادى پايدالانۋشىلار.
ايتا كەتەيىك، Forbes Kazakhstan رەيتينگىنە سايكەس، 2026 جىلى تومسكي قازاقستاننىڭ 75 ەڭ باي بيزنەسمەنىنىڭ اراسىندا 12-ورىندا تۇر. باسىلىم ونىڭ بايلىعىن 865 ميلليون دوللارعا باعالايدى. كاسىپكەر بايلىعىنىڭ نەگىزگى كوزى — IT-بيزنەس.
بۇعان دەيىن Kursiv LifeStyle inDrive نەگىزىن قالاۋشى ارسەن تومسكي مەن كاميلا لۋكپانوۆانىڭ ستامبۋلداعى ۇيلەنۋ تويىن ۇيىمداستىرۋعا شامامەن 470 ميلليون تەڭگە جۇمسالعانىن جازعان. بوسفور جاعاسىنداعى ەكى كۇندىك سالتاناتقا شامامەن 250 قوناق جينالعان.