جاپونيادا ءوتىپ جاتقان XX جازعى ازيا ويىندارىندا 27 جاستاعى سابليست ارتەم ساركيسيان قازاقستانعا سەمسەرلەسۋدەن العاشقى مەدالىن سىيلادى. ول قولا جۇلدەگەر اتاندى، دەپ حابارلايدى infohub.kz سايتى.
قاراعاندىلىق سپورتشى جۇلدەگە بارار جولدا الدىن الا كەزەڭدە بەس سايىستىڭ تورتەۋىندە جەڭىسكە جەتتى. 1/8 فينالدا قازاقستاندىق ءۇندىستاندىق گيشو نيدحي كۋمارەسان پادمانى 15:11 ەسەبىمەن ۇتتى.
شيرەك فينالدا ساركيسياننىڭ قارسىلاسى پاريج-2024 وليمپياداسىنىڭ چەمپيونى وڭتۇستىككورەيالىق گەندونگ دو بولدى. تارتىستى ءارى تەڭ دودادا قازاقستاندىق سابليست 15:14 ەسەبىمەن باسىم ءتۇسىپ، كەمىندە قولا مەدالعا كەپىلدىك الدى.
جارتىلاي فينالدا ساركيسيانعا وڭتۇستىك كورەيانىڭ ودان دا ءقاۋىپتى وكىلى – ءۇش دۇركىن وليمپيادا چەمپيونى ءارى بەس دۇركىن الەم چەمپيونى سانگۋك و قارسى تۇردى. 4:8 ەسەبىمەن ارتتا قالعان قاراعاندىلىق قارسىلاسىن قۋىپ جەتۋگە شاق قالدى – 7:8، الايدا قاتارىنان ەكىنشى سەنساسيا بولمادى: سايىس قورىتىندىسى – 9:15.
جارتىلاي فينالدا جەڭىلگەنىنە قاراماستان، ساركيسيان تاريحتا سابليستەردىڭ جەكە سايىسىندا ازيا ويىندارىنىڭ مەدالىن جەڭىپ العان قازاقستاننىڭ تۇڭعىش وكىلى رەتىندە قالدى.
سول كۇنى قازاقستاندىق راپيراشىلار سوفيا اكتاەۆا مەن الينا گنوەۆا 1/8 فينال كەزەڭىندە ونەرلەرىن اياقتادى، ال سابليست نۇرمۇحامەد جايلىباي ىرىكتەۋ سايىستارىنان وتە المادى.
الدىڭعى كۇنى شپاگاشىلار يرينا باكالدينا مەن ۆلاديسلاۆا اندرەەۆا شيرەك فينالدا قارسىلاستارىنا جول بەرىپ، مەدالدان ءبىر قادام قالعاندا توقتادى.
جالپى، ازيادالاردىڭ سەمسەرلەسۋ تۋرنيرلەرىندە قازاقستان ءۇش التىن، ءتورت كۇمىس جانە 13 قولا مەدال جەڭىپ الدى. شپاگاشىلار قۇراماسى ەكى رەت (1994، 2002) چەمپيون اتاندى، سونداي-اق دميتري الەكسانين وسى قارۋ تۇرىنەن ازيادا-2018-دە جەڭىمپاز بولدى.
XX جازعى ازيا ويىندارىنىڭ سالتاناتتى اشىلۋى 19 قىركۇيەكتە ءوتتى. 45 ەلدىڭ سپورتشىلارى قاتىساتىن جارىستاردا 460 كومپلەكت جۇلدە ساراپقا سالىنۋدا. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى ونەر كورسەتۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. چەمپيوندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتيستەر جولامان بيگابىل مەن سوفيا بەرۋلسەۆا. كەشە قۇراما قورجىنىنا بەسىنشى التىندى مما فايتەرى ەركىنعالي بۇركىتالين، التىنشىسىن – ونىڭ ارالاس جەكپە-جەكتەگى كوماندالاسى قادىربەك شىنبايەۆ سالدى. بۇگىن لۋسەنكو ازيا ويىندارى-2026-نىڭ ەكى دۇركىن چەمپيونى اتاندى.
ويىنداردىڭ ءۇشىنشى كۇنىنەن كەيىن قازاقستان بەيرەسمي مەدال ەسەبىندە ءتورتىنشى ورىندا تۇر.