قازاقستاننىڭ راپيرامەن سەمسەرلەسۋ قۇراماسى گونكونگتا وتكەن الەم چەمپيوناتىنداعى ونەرىن اياقتادى. سوڭعى كۇنى كوماندا ايەلدەر اراسىنداعى تۋرنيردە ونەر كورسەتتى. راپيراشىلاردىڭ ناتيجەلەرىن شاقىرىلعان باپكەر-كەڭەسشى ارتۋر احماتكۋزين قورىتىندىلادى، دەپ infohub.kz سايتى حابارلايدى.
رەسەيلىك مامان وسى جىلدىڭ ناۋرىز ايىنان باستاپ قازاقستان ۇلتتىق قۇراماسىندا شاقىرىلعان باپكەر-كەڭەسشى رەتىندە جۇمىس ىستەيدى. وتاندىق راپيراشىلار سونىمەن قاتار سەمسەرلەسۋ دەڭگەيى وتە جوعارى رەسەيلىك كوماندامەن بىرگە جاتتىعادى. احماتكۋزين قازاقستاندىق سپورتشىلاردىڭ الەم چەمپيوناتىنداعى ونەرى اياقتالعان سوڭ، جاتتىقتىرۋ قاجەت نەگىزگى ساتتەر جانە بىرلەسكەن جاتتىعۋ پروسەسى تۋرالى ايتىپ بەردى.
«قازاقستاننىڭ راپيرامەن سەمسەرلەسۋ قۇراماسى وتە قىزىقتى. جىگىتتەر شەبەر، ءبىراق ءقازىر وزدەرىنە جانە ءوز كۇشتەرىنە دەگەن سەنىم جەتىسپەيدى. ولار ءوز قابىلەتتەرىن تۇسىنبەيتىن سياقتى. سەنىم ناتيجە بولعاندا عانا كەلەدى. مەن ولاردىڭ ەڭبەگى، بەرىلگەندىگى مەن ءوزىن قۇربان ەتۋى ارقىلى ناتيجە بولادى دەپ ۇمىتتەنەمىن. جىگىتتەردىڭ شەبەرلىگى كورىنىپ تۇر، سەبەبى كەڭەستىك مەكتەپتىڭ نەگىزى بار. تەحنيكاسى جانە اياق قيمىلى جاقسى قويىلعان. وسىنداي بازالىق نارسەلەر مەڭگەرىلگەن، ەندى تەك سەنىم قاجەت، ال ول تۇراقتى شىعۋلار مەن حالىقارالىق تۋرنيرلەردەن كەيىن كەلەدى، ويتكەنى باسەكەلەستىك پروسەسىندە جارىسۋ ماڭىزدى. ءدال وسى جەردە، الەم چەمپيوناتىنداعى ونەر تۋرالى ايتسام، جۇمىستى باعالاۋ ءالى قيىن. مەن كوماندامەن ەكى اي بۇرىن جۇمىس ىستەي باستادىم. ناقتى ۇناعانى – جىگىتتەر ءبىرىنشى توپتىق تۋردى سەنىمدى ءوتتى. مەن ءۇشىن ەكىنشى كۇنگە شىعۋ – كورگىم كەلەتىن مينيمۋم. شىعارىلۋ كەزەڭىندەگى جەڭىستەر كۇتىلگەن. بۇل تۇستا ازداپ جەتكىلىكسىز بولدى. قازاقستان قۇراماسى ءۇشىن جاقسى جاعى – ءقازىر رەسەي قۇراماسىمەن بىرلەسكەن جيىندار وتكىزىپ جاتىرمىز. رەسەيدىڭ راپيرامەن سەمسەرلەسۋ قۇراماسى الەمدە وتە كۇشتى. جاتتىعۋ پروسەسىندە ۇلكەن سپاررينگ الامىز، وسىنىڭ ارقاسىندا شەبەرلىك وسەدى. كۇشتىلەرمەن باسەكەلەسۋ – ولاردىڭ ارتىنان ەرۋ دەگەن ءسوز. مەن ءۇشىن بۇل پروگرەسس ايقىن، سەبەبى ءبىرىنشى جيىننان ايىرماشىلىعىن كورىپ وتىرمىن. جيىنداردا ۇنەمى سىناقتار، جاۋىنگەرلىك تاجىريبەلەر وتكىزەمىز، سپورتشىلار وزدەرىن كورسەتەدى. بۇل ەڭبەك ءىزسىز كەتپەيدى دەپ ۇمىتتەنەمىن. بۇل ۇزاق پروسەسس، ولار تالاپتاردى ءتۇسىنىپ، قاجەتتى داعدىلار پايدا بولعاننان كەيىن، جاقىن ارادا ناتيجەلەردە كورىنىس تابادى»، — دەدى احماتكۋزين.
ايتا كەتەيىك، 38 جاستاعى احماتكۋزين 2016 جىلى راپيرامەن سەمسەرلەسۋدەن وليمپيادا چەمپيونى، سونداي-اق رەسەي قۇراماسى ساپىندا 2013 جىلعى الەم چەمپيوناتىنىڭ كۇمىس جۇلدەگەرى.