تۇركىستان وبلىسى ارىس قالاسى اكىمىنىڭ 22 جاستاعى ۇلىنا قاتىستى قىلمىستىق ءىس توقتاتىلدى. ول 20 جاستاعى جىگىتتىڭ ەكى اياعىنان ايىرىلۋىنا اكەپ سوققان جول اپاتىنا قاتىسى بار ەدى، دەپ حابارلايدى infohub.kz سايتى.
بۇل تۋرالى NUR.KZ وبلىستىق پوليسيا دەپارتامەنتىنە سىلتەمە جاساپ مالىمدەدى. ءسوز مامىر ايىنىڭ سوڭىندا استانا — پاۆلودار تاسجولىندا بولعان جول-كولىك وقيعاسى جايىندا بولىپ وتىر.
سول كەزدە كولىك جول بوگەتىنە سوعىلعان. تاكسيدىڭ جولاۋشى ورىندىعىندا وتىرعان 20 جاستاعى جىگىت اۋىر جاراقات الدى. جاس جىگىت كلينيكالىق ءولىمدى باستان وتكەرىپ، ەكى اياعىنان ايىرىلدى.
كەيىن رولدە تۇركىستان وبلىسى ارىس قالاسى اكىمىنىڭ 22 جاستاعى ۇلى بولعانى انىقتالدى. ول قىلمىستىق ءىس بويىنشا كۇدىكتى رەتىندە تانىلدى. اكىمنىڭ ءوزى قايسار مانقارايەۆ كەز كەلگەن ارالاسۋدى جوققا شىعارىپ، لاۋازىمى تەرگەۋ بارىسىنا اسەر ەتپەيتىنىن اتاپ وتكەن بولاتىن.
بۇگىن، 22 قىركۇيەكتە، قىلمىستىق ءىستىڭ امنيستيامەن توقتاتىلعانى بەلگىلى بولدى.
«اعىمداعى جىلعى 16 قىركۇيەكتە جول-كولىك وقيعاسى فاكتىسى بويىنشا قىلمىستىق ءىس قازاقستان رەسپۋبليكاسىنىڭ 2026 جىلعى 1 شىلدەدەگى زاڭىنىڭ امنيستيا اكتىسىنىڭ نەگىزىندە توقتاتىلىپ، بەكىتۋ ءۇشىن ەكىباستۇز قالاسىنىڭ پروكۋراتۋراسىنا جىبەرىلدى. سونىمەن قاتار، زارداپ شەككەن ادامعا ازاماتتىق تارتىپپەن سوتقا جۇگىنۋ ۇسىنىلدى»، — دەدى پاۆلودار وبلىسى پوليسيا دەپارتامەنتىنىڭ ءباسپاسوز قىزمەتى.