قىرعىزستاندا ۇلتتىق قاۋىپسىزدىك مەملەكەتتىك كوميتەتىنىڭ جاڭا ءتوراعاسى رەسمي تۇردە تاعايىندالدى. جوگوركۋ كەڭەش دەپۋتاتتارى بۇل لاۋازىمعا ماكسات اساناليەۆتىڭ كانديداتۋراسىن ءبىراۋىزدان قولدادى، دەپ حابارلايدى infohub.kz سايتى.
24.kg باسىلىمىنىڭ حابارلاۋىنشا، شەشىم 2 قىركۇيەكتە پارلامەنت وتىرىسىندا قابىلدانعان. بۇعان دەيىن سوت-قۇقىقتىق ماسەلەلەر، قۇقىق ءتارتىبى، قىلمىسقا قارسى كۇرەس جانە سىبايلاس جەمقورلىققا قارسى ءىس-قيمىل جونىندەگى ءپروفيلدى كوميتەت اساناليەۆتى باس پروكۋرور قىزمەتىنەن بوساتۋعا كەلىسىم بەرگەن ەدى، دەپۋتاتتار دا بۇل شەشىمدى ءبىراۋىزدان ماقۇلدادى.
ماكسات اسانالييەۆ 1978 جىلى 24 ناۋرىزدا ىستىقكول وبلىسىنىڭ قارا-كوو اۋىلىندا دۇنيەگە كەلگەن. ول قىرعىز ۇلتتىق ۋنيۆەرسيتەتىنىڭ زاڭ فاكۋلتەتىن بىتىرگەن. ەڭبەك جولىن مەملەكەتتىك قاۋىپسىزدىك ورگاندارىندا باستاپ، ۇقمك-دا تەرگەۋشى جانە ەرەكشە ماڭىزدى ىستەر بويىنشا اعا تەرگەۋشى بولىپ جۇمىس ىستەگەن. كەيىن پروكۋراتۋرا جانە قۇقىق قورعاۋ ورگاندارى جۇيەسىندە باسشىلىق قىزمەتتەردى اتقارعان. 2024 جىلى قىرعىزستاننىڭ باس پروكۋرورى بولىپ تاعايىندالسا، بيىلعى جىلدىڭ ماۋسىمىندا ۇقمك ءتوراعاسىنىڭ مىندەتىن اتقارۋشى بولدى.
كاسىبي ورتادا اسانالييەۆ قاتال جۇمىس ستيلىمەن جانە رەزونانستىق قىلمىستىق ىستەردى تەرگەۋ كەزىندەگى ۇستانىمدىلىعىمەن تانىمال.
ەسكە سالايىق، بيىلعى جىلدىڭ اقپان ايىندا كامچىبەك تاشييەۆ مينيسترلەر كابينەتى ءتوراعاسىنىڭ ورىنباسارى جانە ۇقمك ءتوراعاسى قىزمەتىنەن بوساتىلعان بولاتىن. تاشيەۆتىڭ ءوزى كەيىن جۇمىستان شىعارىلۋىن كۇتپەگەنىن مويىندادى. پرەزيدەنت سادىر جاپاروۆ وتستاۆكانىڭ سەبەپتەرىن ءتۇسىندىرىپ، پرەزيدەنت جانىنان مەملەكەتتىك كۇزەت قىزمەتىن قۇرۋدى باستاماشى ەتتى. سونىمەن قاتار، جاپاروۆ مەملەكەت باسشىسىن مەرزىمىنەن بۇرىن سايلاۋ نورمالارىن ءتۇسىندىرۋ ءۇشىن كونستيتۋسيالىق سوتقا جۇگىندى، سودان كەيىن پارلامەنت سپيكەرى نۋرلانبەك تۋرگۋنبەك ۋۋلۋ ءوز ەركىمەن وكىلەتتىگىن تاپسىردى.
كوپ ۇزاماي تاشيەۆتىڭ قىرعىزستانعا ورالعانى تۋرالى حابارلار پايدا بولدى، ال جاپاروۆ بۇرىنعى ۇقمك باسشىسىنىڭ مەملەكەتتىك قىزمەتكە ەشقاشان ورالمايتىنىن مالىمدەدى. سونداي-اق پرەزيدەنت مەملەكەتتىك توڭكەرىس مۇمكىندىگىن جوققا شىعارىپ، ەلدىڭ سولتۇستىك پەن وڭتۇستىككە بولىنۋىنە جول بەرىلمەيتىنىن اتاپ ءوتتى. تاشيەۆتەن كەيىن ۇقمك ءتوراعاسى قىزمەتىن ۋاقىتشا جۋمگالبەك شابدانبەكوۆ اتقارعان.