قازاقستاندىق شاحماتشى بيبيسارا اساۋباەۆا سەنت-لۋيستە ءوتىپ جاتقان Cairns Cup-2026 ايەلدەر سۋپەرتۋرنيرىنىڭ ەكىنشى تۋرىندا ءۇندىستاندىق گروسسمەيستەر ۆايشالي رامەشبابۋمەن تەڭ وينادى. قاتار ءوتىپ جاتقان ەرلەر ءتۋرنيرى Sinquefield Cup-2026-دا اساۋباەۆانىڭ جىگىتى، وزبەكستاندىق جاۆوحير سينداروۆ ءۆايشاليدىڭ اعاسى پراگنانادحا رامەشبابۋدان ۇتىلدى، دەپ حابارلايدى infohub.kz.
جاقىندا وتكەن پرەتەندەنتتەر تۋرنيرىندە ءۇندىستاندىق شاحماتشى اساۋباەۆادان نەبارى 0،5 ۇپايعا وزىپ، قىتايلىق سزيۋي ۆەنسزيۋنمەن الەمدىك ءتاج ءۇشىن ماچقا دايىندالىپ جاتىر. كيپردە قارسىلاستار ەكى رەت تەڭ ويناعان بولاتىن، ال سەنت-لۋيستە رامەشبابۋ ءساتسىز ستارت الىپ، وتانداسى ديۆيا دەشمۋكحتان ۇتىلعاندىقتان، اساۋباەۆامەن ويىن ول ءۇشىن وتە ماڭىزدى ەدى.
اق تۇسپەن ويناعان اساۋباەۆا باسىمدىققا جەتە المادى. 38ء-شى جۇرىستە پوزيسيانىڭ ءۇش رەت قايتالانۋىنا بايلانىستى تەڭ ويىن تىركەلدى. تۋرنيردە امەريكاندىق ەليس لي مەن قىتايلىق تان چجۋني ەكى ۇپايدان جيناپ، كوش باستاپ تۇر. ءۇشىنشى تۋردا اساۋباەۆا قارا تۇسپەن ليمەن وينايدى.
جۇلدە قورى 250 000 دوللاردى قۇرايتىن بەدەلدى Cairns Cup سۋپەرتۋرنيرى امەريكاندىق شاحماتتىڭ مەككەسى اتالاتىن سەنت-لۋيستە (ميسسۋري شتاتى) وتۋدە. تۋرنير سەنت-لۋيس شاحمات كلۋبىنىڭ نەگىزىن قالاۋشىلاردىڭ ءبىرى، الەمدىك شاحمات داڭق زالىنىڭ مۇشەسى دجينن كەرنس سينكفيلدتىڭ قۇرمەتىنە اتالعان. ارنايى شاقىرتۋ العان ون شاحماتشى ءبىر اينالىمدا وينايدى. ۋاقىت باقىلاۋى كلاسسيكالىق: 40 جۇرىسكە 90 مينۋت، سودان كەيىن ويىن سوڭىنا دەيىن 30 مينۋت، ءار جۇرىسكە بىرىنشىدەن باستاپ 30 سەكۋند قوسىلادى.
سەنت-لۋيستە قاتار ەرلەر ءتۋرنيرى Sinquefield Cup-2026 وتۋدە، ول دا دجينن كەرنس سينكفيلدتىڭ قۇرمەتىنە اتالعان. جۇلدە قورى 475 000 دوللار بولاتىن بۇل جارىسقا شاحمات تاجىنە ۇمىتكەر وزبەكستاندىق جاۆوحير سينداروۆ قاتىسۋدا. ەكىنشى تۋردا اساۋباەۆانىڭ جىگىتى قارا تۇسپەن ءۆايشاليدىڭ اعاسى پراگناناندحا رامەشبابۋمەن ويناپ، 95ء-شى جۇرىستە بەرىلدى.