اقمولا گارنيزونىنىڭ اسكەري سوتى بالا تۋعاننان كەيىن تۇرعىن ءۇي تولەمى زاڭسىز توقتاتىلعان اسكەري قىزمەتشىنىڭ قۇقىعىن قالپىنا كەلتىردى، دەپ حابارلايدى infohub.kz.
ق ر اسكەري سوتىنىڭ رەسمي Telegram-ارناسىندا حابارلانعانداي، اقمولا گارنيزونىنىڭ اسكەري سوتى اسكەري قىزمەتشىنىڭ اسكەري بولىمگە قاتىستى اعىمداعى تۇرعىن ءۇي تولەمىن توقتاتۋ تۋرالى شەشىمدى زاڭسىز دەپ تانۋ جانە ونى الۋ قۇقىعىن مويىنداۋ تۋرالى تالاپ ارىزى بويىنشا اكىمشىلىك ءىستى قارادى.
سوت انىقتاعانداي، تالاپكەر اسكەري قىزمەتشى بولىپ تابىلادى جانە بۇرىن تۇرعىن ءۇي تولەمىن الىپ كەلگەن. 2025 جىلعى 3 جەلتوقساندا بالا تۋعاننان كەيىن ول وتباسى قۇرامىن ەسكەرە وتىرىپ، اعىمداعى تۇرعىن ءۇي تولەمىن قايتا ەسەپتەۋ تۋرالى راپورت بەرگەن. الايدا، اسكەري ءبولىمنىڭ تۇرعىن ءۇي كوميسسياسىنىڭ 2026 جىلعى 27 اقپانداعى شەشىمىمەن جانە اسكەري ءبولىم كومانديرىنىڭ 2026 جىلعى 4 ناۋرىزداعى بۇيرىعىمەن تۇرعىن ءۇي تولەمى مۇلدەم توقتاتىلعان.
ءىس ماتەريالدارىن زەرتتەي كەلە، سوت اعىمداعى تۇرعىن ءۇي تولەمىن توقتاتۋ نەگىزسىز دەگەن قورىتىندىعا كەلدى، ويتكەنى شەشىم قابىلداۋ كەزىندە تالاپكەردىڭ وتباسى قۇرامىنىڭ وزگەرۋىنە جانە بالانىڭ تۋىلۋىنا بايلانىستى ءمان-جايلار ەسكەرىلمەگەن.
سوت شەشىمىمەن اعىمداعى تۇرعىن ءۇي تولەمىن الۋ قۇقىعى مويىندالدى. جاۋاپكەرگە بالانىڭ تۋىلۋىن ەسكەرە وتىرىپ، اعىمداعى تۇرعىن ءۇي تولەمىن جۇرگىزۋ مىندەتى جۇكتەلدى. سونداي-اق، جاۋاپكەردەن مەملەكەتتىك باج سالىعىن تولەۋ بويىنشا سوت شىعىندارى ءوندىرىلدى.
ءىستى قاراۋ ناتيجەسىندە تالاپكەردىڭ تالاپ ارىزى قاناعاتتاندىرىلدى.