اقش جاعالاۋ كۇزەتى بەرمۋد ارالدارىنان بوستونعا ۇشىپ بارا جاتقان، بورتىندا التى ادام بولعان مەديسينالىق جەدەل جاردەم ۇشاعىن ىزدەستىرىپ جاتىر. ۇشاق سەنبى كۇنى تاڭەرتەڭ اقش فەدەرالدىق اۆياسيا اكىمشىلىگىمەن (FAA) بايلانىسىن ۇزگەن، دەپ حابارلايدى infohub.kz سايتى.
وسى اكىمشىلىك وكىلى Guardian باسىلىمىنا بەرگەن مالىمدەمەسىندە Gulfstream G-100 ۇشاعىنا قاتىستى ىزدەۋ-قۇتقارۋ دابىلى جەرگىلىكتى ۋاقىتپەن سەنبى كۇنى تاڭعى 1.20-دا جاريالانعانىن ايتقان.
Associated Press اگەنتتىگى بەرمۋد اۋەجايىنىڭ وپەراتورى Skyport كومپانياسىنىڭ مالىمدەمەسىنە سىلتەمە جاساپ حابارلاعانداي، كانادادا تىركەلگەن مەديسينالىق جەدەل جاردەم ۇشاعى تۇندە بەرمۋدتاعى LF Wade حالىقارالىق اۋەجايىنان ماسساچۋسەتسكە قاراي ۇشقان كەزدە بورتىندا ءتورت ەكيپاج مۇشەسى مەن ەكى جولاۋشى بولعان.
NBC News تەلەارناسى ۇشاق وپەراتورى — Latitude Air Ambulance كومپانياسىنىڭ ۇشۋ وپەراسيالارى جونىندەگى ديرەكتورى كلارەنس توگەرەتستىڭ مالىمدەمەسىنە سىلتەمە جاساپ، ۇشاق بەرمۋدتا مەديسينالىق ەۆاكۋاسيا جۇرگىزىپ جاتقانىن حابارلادى.
«ەكيپاجىمىز ۋاقىتىلى حابارلاسپاعان كەزدە ءبىز ءاردايىم قاتتى الاڭدايمىز. ءبىراق تاعى دا ايتامىن: وپتيميستىك جانە وڭ كوزقاراسپەن قاراساق، بۇل ەڭ ناشار جاعداي بولدى دەگەندى بىلدىرمەيدى»، — دەدى ول NBC News-كە.
سونداي-اق NBC بوستونداعى Logan حالىقارالىق اۋەجايىن باسقاراتىن ماسساچۋسەتس پورت بيلىگىنىڭ ۇشاق كەستەدەگى ۋاقىتىندا كەلمەگەنىن مالىمدەگەنىن جازدى. پورت بيلىگىنىڭ وكىلى: «ىزدەۋ جالعاسىپ جاتقاندا، ويىمىز بورتتاعىلارمەن جانە ولاردىڭ جاقىندارىمەن بىرگە»، — دەگەن.
FAA ۇشاقتى تابۋ ءۇشىن قۇتقارۋ ۇيلەستىرۋ ورتالىعىمەن جانە اقش جاعالاۋ كۇزەتىمەن بىرلەسىپ جۇمىس ىستەپ جاتىر.
جاعالاۋ كۇزەتى X الەۋمەتتىك جەلىسىندەگى پاراقشاسىندا جاريالاعان مالىمدەمەسىندە سەنبى كۇنى تاڭەرتەڭگى جاعداي بويىنشا ىزدەۋ ايماعى ماسساچۋسەتس شتاتىنداعى نانتاكەت ارالىنىڭ جاعالاۋىندا ەكەنىن حابارلادى.
مالىمدەمەدە اۋە جانە سۋ ءۇستى توپتارى ۇشاقتى ىزدەۋگە كىرىسكەنى قوسىلعان.
ABC News تەرگەۋگە قاتىسى بار دەرەككوزگە سىلتەمە جاساپ، ۇشاق بورتىندا امەريكالىقتار بولماعانىن حابارلادى، الايدا بورتتاعىلاردىڭ كىم ەكەنى دەرەۋ جاريالانباعان.
باسىلىمنىڭ دەرەككوزىنە قاراعاندا، شەنەۋنىكتەر ۇشاق سۋعا قۇلاماس بۇرىن 7 500 فۋت بيىكتىككە دەيىن جىلدام تومەندەگەن دەپ ەسەپتەيدى.