اقمولا وبلىسىندا كادرلىق وزگەرىس بولدى: وبلىس اكىمىنىڭ وكىمىمەن اسحات احمەديانوۆ ارشالى اۋدانىنىڭ اكىمى بولىپ تاعايىندالدى، دەپ حابارلايدى infohub.kz سايتى.
تاعايىنداۋ تۋرالى اقمولا وبلىسى اكىمدىگىنىڭ رەسمي Telegram-ارناسى حابارلادى. بۇعان دەيىن اسحات احمەديانوۆ 2026 جىلدىڭ اقپانىنان باستاپ جاڭا تاعايىنداۋعا دەيىن اقمولا وبلىسى كاسىپكەرلىك جانە ونەركاسىپ باسقارماسىنىڭ باسشىسى قىزمەتىن اتقارعان.
اسحات احمەديانوۆ 1992 جىلى 29 مامىردا سولتۇستىك قازاقستان وبلىسى ءۋاليحانوۆ اۋدانىنىڭ كومسومولسكوە اۋىلىندا دۇنيەگە كەلگەن. 2013 جىلى «تۇران-استانا» ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىعى بويىنشا بىتىرگەن.
اۋداننىڭ جاڭا اكىمىنىڭ ەڭبەك جولى نەگىزىنەن اتباسار اۋدانىمەن بايلانىستى. 2014–2017 جىلدارى اتباسار اۋدانى نوۆوالەكساندروۆ اۋىلدىق وكرۋگى اكىمى اپپاراتىنىڭ باس مامانى بولىپ جۇمىس ىستەگەن. 2017 جىلى اتباسار اۋدانى باستاۋ اۋىلدىق وكرۋگى اكىمى اپپاراتىنىڭ باس مامانى قىزمەتىن اتقارعان.
2017–2019 جىلدارى احمەديانوۆ اتباسار اۋدانى پوكروۆ اۋىلدىق وكرۋگىنىڭ اكىمى بولدى، 2019–2021 جىلدارى اتباسار اۋدانى كاسىپكەرلىك ءبولىمىن باسقاردى. كەيىن، 2021–2023 جىلدارى اتباسار اۋدانى ماكەيەۆ اۋىلدىق وكرۋگىنىڭ اكىمى قىزمەتىن اتقارسا، 2023–2026 جىلدارى زەرەندى اۋدانى اكىمىنىڭ ورىنباسارى بولدى.
ەسكە سالايىق، 21 قىركۇيەكتە اقمولا وبلىسىندا ستەپنوگورسك اكىمى عايدار كاسەنوۆ پەن ارشالى اۋدانىنىڭ اكىمى دوستانبەك ەسجانوۆ قىزمەتتەرىنەن بوساتىلعان بولاتىن. سول كۇنى ستەپنوگورسك اكىمى قىزمەتىنە تالعات ەرسەيتوۆ تاعايىندالدى.