بەلگيالىق جۇك اۋەكومپانياسى ASL Airlines Belgium ۇشاقتارى الماتى حالىقارالىق اۋەجايىندا جانارماي قۇيا باستايدى. ءتيىستى كەلىسىمشارتتى «قازمۇنايگاز» ۇك» اق ەنشىلەس كاسىپورنى – «قازمۇنايگاز-اەرو» ج ش س جاساستى. جوبا قازاقستاننىڭ ترانزيتتىك الەۋەتىن دامىتۋعا جانە حالىقارالىق جۇك تاسىمالداۋشىلاردى تارتۋعا باعىتتالعان، دەپ حابارلايدى infohub.kz.
كومپانيادا اتاپ وتكەندەي، ىنتىماقتاستىق مەملەكەت باسشىسىنىڭ قازاقستاندى ەۋرازياداعى نەگىزگى اۆياسيالىق جانە كولىكتىك-لوگيستيكالىق حابتاردىڭ ءبىرى رەتىندە نىعايتۋ جونىندەگى تاپسىرمالارى اياسىندا جۇزەگە اسىرىلۋدا. كەلىسىمگە سايكەس قازاقستاندىق تاراپ ەۋروپالىق تاسىمالداۋشىنىڭ رەيستەرىنە حالىقارالىق ساپا ستاندارتتارىن ساقتاي وتىرىپ قىزمەت كورسەتۋدى قامتاماسىز ەتەدى.
بۇل الماتى اۋەجايىنىڭ ازيا مەن ەۋروپا اراسىنداعى اۋە باعىتتارىنىڭ قيىلىسىنداعى ءتيىمدى ورنالاسۋىنىڭ ارقاسىندا ترانزيتتىك تەحنيكالىق قونۋلار مەن حالىقارالىق جۇكتەردى وڭدەۋ ءۇشىن تارتىمدىلىعىن ارتتىرادى دەپ كۇتىلۋدە. كومپانيادا ASL Airlines Belgium-مەن ىنتىماقتاستىق حالىقارالىق اۋە تاسىمالداۋشىلارىنىڭ قازاقستاندىق اۆياجانارمايمەن قامتاماسىز ەتۋ ينفراقۇرىلىمىنا سەنىمىن كورسەتەتىنىن اتاپ ءوتتى.
ASL Airlines Belgium 1999 جىلى قۇرىلىپ، بۇرىن TNT Airways دەگەن اتپەن جۇمىس ىستەگەن. ءقازىر اۋەكومپانيا حالىقارالىق ASL Aviation Holdings توبىنىڭ قۇرامىنا كىرەدى جانە Boeing 737 جانە جۇك Boeing 747-400ERF ۇشاقتارىنان تۇراتىن اۋە پاركىن پايدالانادى. تاسىمالداۋشى ەۋروپا، جۇڭگو جانە اقش-تى بايلانىستىراتىن باعىتتار بويىنشا تۇراقتى رەيستەردى ورىندايدى، سونداي-اق بەلگيانىڭ لەج قالاسىنداعى بازالىق اۋە تورابىن باسقارادى جانە FedEx-TNT ەكسپرەسس-تاسىمالداۋشىسى ءۇشىن لوگيستيكالىق وپەراسيالاردى قامتاماسىز ەتەدى.
«قازمۇنايگاز-اەرودا» الەمنىڭ جەتەكشى جۇك اۋەكومپانيالارىمەن ىنتىماقتاستىقتى كەڭەيتۋ قىزمەتتىڭ باسىم باعىتتارىنىڭ ءبىرى بولىپ قالاتىنىن اتاپ ءوتتى. كومپانيا حالىقارالىق سەرىكتەستىكتى ودان ءارى دامىتۋدى، قاتىسۋ گەوگرافياسىن كەڭەيتۋدى جانە قازاقستان اۋەجايلارىندا اۆياسيالىق وتىن جەتكىزۋ كەزىندە قىزمەت كورسەتۋدىڭ جوعارى دەڭگەيىن قامتاماسىز ەتۋدى جوسپارلاپ وتىر.