قازاقستان استاناسىنداعى ەسكى استانا-1 تەمىرجول ۆوكزالىنىڭ رەكونسترۋكسياسى قارقىندى ءجۇرىپ جاتىر. جۇمىستار اياقتالعان سوڭ ۆوكزال الاڭى 500 شارشى مەترگە ۇلعايىپ، 8،7 مىڭ شارشى مەترگە جەتەدى، دەپ حابارلايدى infohub.kz سايتى.
قازىرگى ۋاقىتتا نىساندا عيماراتتىڭ شاتىرى مەن قاسبەتىن ورناتۋ، پەررون مەن كونكورس وتكەلىن قايتا جاڭارتۋ جۇمىستارى جۇرگىزىلۋدە. سونىمەن قاتار ىشكى ارلەۋ جۇمىستارى، سۋمەن جابدىقتاۋ، كارىز، جىلۋ، ەلەكترمەن جابدىقتاۋ، جەلدەتۋ جانە بايلانىس جۇيەلەرىن مونتاجداۋ قاتار اتقارىلۋدا. رەكونسترۋكسياعا 255 مامان مەن 12 بىرلىك قۇرىلىس تەحنيكاسى جۇمىلدىرىلعان.
قازاقستان رەسپۋبليكاسى كولىك مينيسترلىگى جۇمىستار اياقتالعاننان كەيىن ۆوكزال قاۋىپسىزدىك، جايلىلىق جانە قولجەتىمدىلىكتىڭ زاماناۋي تالاپتارىنا ساي بولاتىنىن ۋادە ەتەدى. جولاۋشىلارعا ارنالعان جاڭا ەسكالاتورلار، ليفتىلەر مەن كوتەرگىش پلاتفورمالار ورناتىلىپ، پاندۋستار، انا مەن بالا بولمەلەرى، زاماناۋي سانيتارلىق بولمەلەر مەن كۇتۋ ايماقتارى جابدىقتالادى.
«مودەرنيزاسيا اياسىندا زاماناۋي بەينەباقىلاۋ، ءورت دابىلى، كىرۋگە باقىلاۋ جانە جولاۋشىلاردى حاباردار ەتۋ جۇيەلەرى ەنگىزىلۋدە. سونىمەن قاتار جاڭا LED-ەكراندار ورناتىلىپ، داۋىستىق حابارلاۋ جۇيەلەرى، جيھاز بەن تەحنولوگيالىق جابدىقتار جاڭارتىلۋدا»، — دەپ مالىمدەدى ۆەدومستۆودان.
استانا-1 ستانسياسىنىڭ جولاۋشىلار اعىنى 2026 جىلدىڭ جەتى ايىندا 1،8 ميلليون ادامنان استى. ونىڭ ىشىندە 908 مىڭنان استام جولاۋشى استانادان جونەلسە، 977 مىڭنان استامى استاناعا كەلگەن.
بۇعان دەيىن «كۋرسيۆ» استانا-1 ۆوكزالىنىڭ مەردىگەرىنە مەرزىمگە ۇلگەرۋ ءۇشىن جۇمىستى جەدەلدەتۋ تاپسىرىلعانىن حابارلاعان بولاتىن.