استانادا جەرگىلىكتى تۇرعىنعا قاتىستى سوت ۇكىم شىعاردى. ول بىرنەشە اي ىشىندە 80-نەن استام رەت جول قوزعالىسى ەرەجەلەرىن بۇزعان. مامانداندىرىلعان اۋدانارالىق اكىمشىلىك سوت وعان 15 تاۋلىك قاماۋ جازاسىن تاعايىندادى، دەپ حابارلايدى infohub.kz.
سوت انىقتاعانداي، ازامات ج. 2026 جىلعى ناۋرىز-ماۋسىم ارالىعىندا 80-نەن استام رەت اكىمشىلىك جاۋاپكەرشىلىككە تارتىلعان. ونىڭ ىشىندە جىلدامدىقتى اسىرۋ دا بار. ەكى جاعدايدا ونىڭ جىلدامدىعى 151 كم/ساع جانە 126 كم/ساع بولعان. بۇل باسقا جول قوزعالىسىنا قاتىسۋشىلاردىڭ قاۋىپسىزدىگىنە ءقاۋىپ توندىرگەن.
سوت وتىرىسىندا ەر ادام كىناسىن تولىق مويىنداپ، وكىنىش ءبىلدىردى. ول بىرنەشە رەت جىلدامدىقتى اسىرعانىن راستاپ، بارلىق ايىپپۇلدى تولەگەنىن ايتتى. سونداي-اق كوپ جاعدايدا ءوزى كولىك جۇرگىزگەنىن ءتۇسىندىردى. سوتتا: «كىنالىنىڭ كىناسى ونىڭ مويىنداۋى، اكىمشىلىك قۇقىق بۇزۋشىلىق حاتتاماسى، «سەرگەك» سەرتيفيكاتتالعان بۇزۋشىلىقتاردى تىركەۋ جۇيەسىنىڭ دەرەكتەرى (بەينەجازبالار مەن فوتوسۋرەتتەر)، ارنايى ەسەپكە الۋ مالىمەتتەرى، سونداي-اق باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتى دەپارتامەنتىنىڭ حاتىمەن راستالدى»، — دەپ قوستى.
سوت ونى ق ر اقبتك-نىڭ 434-بابىنىڭ 1-بولىگى بويىنشا كىنالى دەپ تاۋىپ، 15 تاۋلىككە اكىمشىلىك قاماۋعا الدى. جازا تاعايىنداۋ كەزىندە ارەكەتتەردىڭ قاساقانا سيپاتى، جول قوزعالىسىنا قاتىسۋشىلاردىڭ ءومىرى مەن دەنساۋلىعىنا جوعارى ءقاۋىپ، سونداي-اق 2026 جىلدىڭ باسىنان بەرى جۇرگىزۋشىنىڭ 80-نەن استام رەت جىلدامدىقتى اسىرعانى ەسكەرىلدى. سوت قاۋلىسى ءالى زاڭدى كۇشىنە ەنگەن جوق.